namminiilerneq
Partii Naleraq: Namminersulivinnissamut qaninnerulissaagut
Innuttaasut nunarput namminersornerulernissaanut peqataaffigissavaat, partii taama oqariartuuteqarpoq
Nunatta naalagaaffinngornissaanut alloriarnissatsinnut suliaq aallartissallugu piffissanngorpoq, nunattami inui isiginnaartuinnaajunnaarlutik aqutsisinnaanermut nukissaqarput.
Taama Partii Naleqqap Inatsisartunut ilaasortai, Hans Enoksen, Anthon Frederiksen aamm Per Rosing Petersen oqariartuuteqarput.
Inatsisartut nunatta tunngaviusumik inatsiseqalissanersoq oqallisigereeraallu, partiip namminersornerulernissamik oqariartuuteqarnera pivoq.
Utaqqeqqikkusunngitsut
Partii Naleqqap nuannaarutigaa, kalaallit tunngaviusumik inatsiseqalernissaata eqqarsaatigineqarnera Inatsisartuni partiinit annernit taperserneqarnera, tassa Siumumit aamma Inuit Ataqatigiinnit.
Tassami partii isumaqarpoq, ullumikkut sulilluta namminiilivinnissamut aallartittoqassasoq 'uagutsinnut utaqqiinnarluta angusaqassanngilagut aammami inuiaat allat takkunnavianngillat namminiilivinnissamik neqeroorffigiartorluta', partiip oqariartuuteqarneratut.
- Sapersorilerluta aamma mianersuummerluta aperigutta: Aningaasaqarnerpummi aaqqeqqaartariaqannginnami? Danmarkimiit tapiissutit matussuseqqaassannginnamik? Pissakinnerillu atugaat aaqqeqqaartariaqanngilagut? Nuna sunaluunniit unammilligassaqartarpoq. Nunali naalagaaffik kiffaanngissuseqarluni aporfilersorneqarani iliuuseqarsinnaaneruvoq, Partii Naleqqamit Inatsisartuni ilaasortat taama erseqqissaapput.
Atuaruk: Tunngaviusunik inatsisinut piumasaqaat nutaaq