Aningaasanut inatsit
Partii Naleraq: Naalakkersuisut Sorlak ipisinniarpaat
Hans Enoksenip (PN) meeqqat inuusuttullu kattuffiat aappaagu aningaasanut inatsimmi sipaarniarfigineqarnera assut kipiluttunarnerarpaa
Meeqqat inuusuttullu Nunatta siunissarai, taamaattumik Partii Naleqqap ilinniartitaanermut, kultureqarnermut, ilisimatusarnermut aamma ilageeqarnermut naalakkersuisoqarfiup sipaarniarfigimmagit akuerisinnaanngilaa.
Partii Naleqqami siulittaasoq, Hans Enoksen, tusagassiuutinut nalunaarummi taama allappoq.
Naalakkersuisut 2016-imut aningaasanut inatsimmi kattuffimmut tapiissutit ikilineqarnerisa kingorna tamanna pivoq.
Suliat annertuut
Hans Enoksen oqariartuuteqarpoq, kattuffik assut pingaaruteqarsimasoq 'ukiuni 30-ini meeqqanut inuusuttunullu suliat annertummata ilaatigut højskolertitsisarnermut, pinaveersaartitsinermut suliat soorlu imminut toquttarneq akiorniarlugu suliat'.
- Naalakkersuisooqatigiinnissamut isumaqatigiissummi ersarilluinnartumik allaqqavoq: ‘Naalakkersuisooqatigiit meeqqat inuusuttullu toqqissisimasut, imminnut tatigisut inoqatiminnik ataqqinnittut, peqqissut, tarnikkut timikkullu nukittuut kinaassutsiminnik ilisimasarinnittut pilersinnissaat.' Naak Sorlak qitiulluinnartumik tassani suliniuteqartuugaluartoq nukkassagassaagaluarlutik nukillaarsarneqarput, Partii Naleqqami siulittaasoq taama oqariartuuteqarpoq.