akitsuutit
Partii Naleraq: Inatsisartut uukapaatinneqarput
Akitsuusersuinermut suliamut assortuussutaasumut tunngatillugu, illuatungiliuttut Naalakkersuisut paasissutissanik toqqortuinerarpaat
Ukiaq manna Inatsisartuni akitsuutinik atuutilersitsinermi Inatsisartunut eqqunngitsumik Naalakkersuisuniit aalajangersaatitsisoqarpoq, tamannalu Inatsisartuunt ilaasortanut uukapaatitsinertut isertuussinertullu taaneqartariaqarpoq.
Partii Naleqqameersup Hans Enoksenip Inatsisartut siulittaasoqarfianut ammasumik allagaani tamanna atuarneqarsinnaavoq.
Paasissutissiisoqanngitsoq
Partiip illuatungiliuttup maalaarutigaa, Naalakkersuisut namminneq - Inatsisartut ilisimateqqaarnagit - akitsuusersuinissat assortuussutaasut ilaatigut mamakujuttunut, kingumoortumik aggustip 20-anut atuuttussanngoraat.
Partii Naleqqap aamma tikkuarpaa, inatsisissami saqqummiussiissumi siullermik saqqummiunneqartumi oqaatigineqartoq, ulloq taanna Inatsisartuni akuersissutigineqarpata akitsuutit atuutilersinneqassasut ilisimatitsissutigineqarsimasoq.
Akissuteqanngitsut
- Partii Naleqqamiit Naalakkersuisunut ullut atuutinneqalertussat ullui assigiinngimmata sorleq ilumoornersoq apersuutigigaluarparput, kisianni aamma Naalakkersuiusunit akineqanngitsoorluta, Hans Enoksen allakkami ammasumi erseqqissaavoq.
- Naalakkersuisuit namminneq Inatsisartunut ilisimatitsinertaqanngitsumik kingumoortumik akitsuutit 20. august atuutilernissaannik aalajangersaanerat akuersaarneqarsinnaanngilaq. Tamanannalu eqqunngitsumik aamma suliamik isertuussinertut taasariaqarpoq. Tamanna pisoq Naalakkersuinikkut attanneqarsinnaanngilaq, Hans Enoksen ilanngullugu oqarpoq.
Misissorneqartariaqartoq
Taassuma kajumissaarutigaa, Inatsisartut siulittaasoqarfiata tamanna misissortariaqaraa, aalajangersaasoqarnerani Inatsisartuni ilaasortat sooq ulloq atuutilerfissaa pillugu ilisimatinneqannginnersut, tassalu 20. august 2015.