Inatsisartut
Partii Naleraq immikkoortitsinermik oqaaseqarnermit isumaqataanngilaq
- Per-Rosing Petersenip Kalaallit Nunaat Afrika Kujallermut immikkoortitsilluni aqutsinerup nalaanut sanillersuinera, Partii Naleqqap isumaanik oqaaseqarnerunngilaq, partiimi siulittaasoq Hans Enoksen naqissusiivoq
Partii Naleraq maanna Inatsisartuni ilaasortaatitami Per-Rosing Petersenip Kalaallit Nunaannik Afrika Kujallermut sanilliussineranit isumaqataannginnerarpoq.
Taamatut oqariartuuteqarneq Inatsisartuni marlunngornermi inuussutissarsiornikkut siuarsaanissaq pillugu oqallittoqarneranut atatillugu saqqummerpoq.
Apartheid
Tassani Partii Naleqqami oqaaseqartartup Per-Rosing Petersenip, nunarput Sydafrikamut sanilliuppaa - ammit qalipaataanik immikkoortiteraluni (apartheid) aqutsisoqarneranut assingutitsilluni.
Taamatut oqaaseqarneq Inatsisartuni ilaasortanit marlunnit, Naaja Nathanielsen (attaviittoq) aamma Justus Hansen (Demokraatit) sakkortuumik qisuariartitsivoq.
Atuaruk: Justus aamma Naaja: Qinngarsuilluni oqalugiarneq unitsinniarli
Nammineq isumaa
Tamatumalu kingorna Partii Naleqqap siulittaasua, Hans Enoksen, sanilliussinermut isumaqataannginnerarpoq.
- Isertuutinngisaannarparput nunaqavissut salliunneqartuartarnissat oqariartuutigisaratsigu. Inatsisartunili oqallinnermi Partii Naleqqamiit oqaaseqartup oqaaseqaatimini partiip oqariartuutaanit allaanerusumik nipilimmik oqaaseqarpoq
Oqallinnermi pussuserissaarneq
- Ilaatigut Sydafrikkami pissutsinut aamma apartheideqartoqarnerasut nipilimmik nunatsinnut sanillersuussisoqarnera, Partii Naleqqamiit tamanna oqariartuutaanngilaq, oqaaseqartulli Per Rosing-Petersenip taakku nammineerluni isummani pigivai. Uaguttaaq oqallinnermi pissuserissaarnissaq pingaartipparput, suleqatigiilluarnissarlu angorusullugu, Hans Enoksen tusagassiuutinut nalunaarummi naqissusiivoq.