Partii Naleraq folketingimut qineqqusaartussaminik saqqummiivoq
Regine Møller, 28, Partii Naleraq sinnerlugu folketingimut qineqqusaassaaq.
Partii Naleqqami siulittaasup, Hans Enoksenip, RUC-mi niuernermik ilinniagartuunngorniartoq, 28-nik ukiulik Regine Møller, folketingimut juunip tallimaanut qinersinissamut partii sinnerlugu qineqqusaartoq ullumi saqqummiuppaa.
Tusagassiortunik katersortitsinermi partiip qineqqusaarutissatut pingaarnertut suliassatik ilanngullugit saqqummiuppaat.
- Pingaartitakka Partii Naleqqap aamma pingaartitarai. Namminersulernissaq anguniarlugu sulerusuppunga, inuiaqatigiit kissaatigippassuk Kalaallit Nunaat namminiilissasoq tassunga piareersimaniassagatta, Regine Møller oqarpoq.
Partii Naleraq taamaasilluni pingasunik qineqqusaartoqalerpoq, Pele Broberg, Kuno Fencker aamma Regine Møller.
Qineqqusaarnermi suliniutit
Partii Naleraq folketingimi issiatitaqalissaguni pingaarnertut pingasunik suliniuteqarumavoq. Tassa namminiilivinnissaq, suliassaqarfiit 33-iusut maanna naalagaaffiup Kalaallit Nunaat sinnerlugu ingerlatai, nunatsinnit oqartussaaffigineqalissapput. Partiip sulissutigiumavaa suliassaqarfiit ataasiakkaarlugit nalilersorneqassasut, taamatullu oqartussaaffimmik tigusinissamik kinguneqartumik.
Kalaallit Nunaanni pisuussutit naleqarnerulersinneqassapput, naligat nunatsinnut iluaqutaasussanngortinneqarluni.
Atugarissaarneq qulakkeerneqassaaq, nunarput aningaasaqarnikkut patajaatsumik ingerlanissaa qulakkeerneqarluni.
- Qineqqusaarutit pillugit apeqqutit sapaatip akunnerata tulliani akisinnaalissavagut, sammisat pillugit ilutsinni oqaloqatigeeqqaartussaagatta, Regine Møller oqarpoq.
Taama oqarneq Hans Enoksenimit aamma Pele Brobergimit, tusagassiortunik katersortitsinermi peqataasunit, ilalerneqarpoq.