Issittoq

Partii Naleraq: Eskimologimik ilinniarfik Nunatsinnut nuunniarli

Kalaallit Nunaat nammineerluni issittumi ilisimatusarnermik ingerlatsisinnaavoq, Hans Enoksen isumaqarpoq

Eskimologimik ilinniarneq Nunatsinnut nuunneqarsinnaasoq, Hans Enoksenip (PN) isumaqarpoq

Københavns Universitetimi Eskimologimik ilinniarfiup 2016-imi sipaarniarneq pissutigalugu ilinniartunik aallartitsisarunnaarniarnera, ulluni kingullerni annertuumik isornartorsiorneqarpoq.

Eskimologimi aamma Arktiske Studiemi ilinniartup, Ortu Mørch Olsenip, aalajangiineq paasisinnaanngilaa, folketingimilu ilaasortaq Aaja Chemnitz Larsen (IA), pingaarnersiuineq kukkulluinnartoq isumaqarpoq, kingullermillu WWF Verndensnaturfondenip generalsekretærianit aalajangerneq 'sianilliornertut' oqaatigaa.

Atuaruk: WWF Eskimologip matuneqarnera pillugu: Sianiilliorluni aalajangerneq

Ilinniagaq maanga nuulli
Partii Naleraq tamanna pillugu allatut isumaliuuteqarpoq. Partii isumaqarpoq, taanna ilinniagaq nunatsinniissinnaagaluartoq.

- Nunatsinni inuit issittumi najugallit pillugit ilisimatusarneq nammineerluta ingerlanniartigu, allat naatsorsuutigiinnarnatigit. Taamaalilluta nammineerluta ilisimatusarfipput aamma qaffassaqqissagaluarparput, partiip siulittaasua Hans Enoksen tusagassiuutinut nalunaarummi oqarpoq.

Atuaruk: Eskimologi-p matuneqarnera ilinniagaqartut tupassutigeqaat

Periarfissat atorluarlugit
Aningaasarpassurnik naleqartussaagaluartoq, tamanna aporfiusariaqanngitsoq taanna isumaqarpoq.

- Nunarput naalagaffinngortinniarlugu sulivugut anguniarlugulu, taamaattumik nunatsinni ingerlassinnaasagut periarfissallu atorluarlugit soorlu ilisimatusarfik ingerlattariaqalerpagut, Hans Enoksen oqarpoq.

Atuaruk: Aaja: Eskimologi pingaarnerutinneqannginnera kukkulluinnarpoq

Powered by Labrador CMS