Partii Naleraq allamik ateqalissaaq allamillu ilisarnaateqalerluni
Ilisarnaat allaanerusoq atorlugu, inussuup pingasoqiusamik ilusaa pissaanerup pingasoqiusaaneranik takutitsisoq atorlugu, Partii Naleraq nutarsaaniarpoq.
Partii Naleraq – imaluunniit eqqortumik taallugu Naleraq – nutarsaaniarpoq, neriuutigalugulu nutarsaanermi qinersisartut inuusuttut soqutiginninnerat annertunerulissasoq.
- Isummanik misissuinerup, Sermitsiami atuarneqarsinnaasup takutippaa qinersisartut inuusuttut uagutsinnut qinerserusuttut amerleriarsimasut, Pele Broberg oqarpoq.
Partiip aqqa naalineqarpoq
Nutarsaaneq ataatsimeersuarnermi aallartinneqassaaq. Coronavirusip atuunnera pissutigalugu suli ataatsimeersuartoqanngilaq. Ataatsimeersuartoqarnissaata tungaanut, aamma qineqqusaarnerup nalaani partiip aqqa nutaanngitsoq ilisarnaataalu nutaanngitsoq atorneqarsinnaassapput.
Naleqqap politikerii partiip aqqata ilisarnaataatalu allanngortinnerata saniatigut 2018-imiilli qinersisartunik digitaliusumik attaveqarnerulerput. Soorlu Facebookimi aamma Youtubemi toqqaannartumik aallakaatitsinerulerlutik, qinersisartullu toqqaannartumik apeqquteqarnissaannik periarfissaqartitsisarlutik.
Ataasiakkaat nakuussusaat
Inussuup nalerassatut inissinnera ima nassuiaatigineqarpoq:
- Inuup namminerisamik nukittussusaa inuiaqatigiillu ataatsimoorlutik suleqatigiissinnaanerat inuunermi ingerlaannarsinnaanermut tunngaviulluinnarput. Taamaammat partii aalajangersimalluinnartumik isumaqarpoq ataasiakkaat iluaqutissaannik qulakkeerissalluni, inuiaqatigiit tamarmiusunut tamanna ajoqutaassanngippat. Namminiilivinnissamut suliniartoqassanngilaq inuiaqatigiit akigalugit, partiip siulittaasua Hans Enoksen tusagassiorfinnut nalunaaruteqarluni allappoq.