Partii Naleqqap Siumut itigartippaa
Partii Naleraq Siumut siulersuisuunerinik ullumi isumaqatiginninniaqataavoq. Tatiginnissinnaannginnerli tunngavilersuutigalugu PN maanna isumaqatiginninniarnernit anivoq.
Siumut siulersuisuunerisa, Erik Jensen siuttoralugu, aamma Naalakkersuisut siulittaasuata Kim Kielsenip nalunaarneri imminnut assigiinngippallaarput. Taamaammat Partii Naleqqap Siumut tatigisinnaanngilaa.
Partii Naleraq taamaammat isumaqatiginninniarnernit peqataajunnaarpoq.
Pele Broberg tusagassiorfinnut taama nalunaaruteqarluni allappoq.
- Partii naleraq ualeq manna ataatsimeeqateqarsimavoq Siumup sinniisai Erik Jensen aamma Vivian Motzfeldt peqatigalugit. Ataatsimiinnermi aallaaviuvoq periarfissaqarnersoq naalakkersuisunik siammasissumik pilersitamik ikaarsaarnermi pilersitsisoqarsinnaanersoq, ukiut kingulliit naalakkersuisooqatigiissimasuni pisimasut torersarniarlugit, allappoq.
Ikinnerussuteqarlutik naalakkersuissapput
Kim Kielsen tunuarnissamik qinersisitsinissamilluunniit siunniussaqarpasinngimmat, Partii Naleqqap Siumumik suleqateqarniarnissani maanna takujuminaatsippaa. Kim Kielsen tusagassiortunik ullumi katersortitsigami oqarpoq Nunatta Qitornai peqatigalugit ikinnerussuteqarlutik naalakkersuinermik ukiukkut ataatsimiinnerup tungaanut ingerlassallutik.
- Nunatta Qitornaaniit taamatut ersaritsigisumik nalunaaruteqareermata suleqatigiinnermut siammasissumik peqataaniarnatik, aammalu Siumup Naalakkersuisooqatigiinni suleqateqarnertik ingerlatiinnalermassuk, taava imatut paasineqassaaq Naalakkersuisut siulittaasua piumassusseqanngitsoq Naalakkersuisut atorunnaarnissaannut (forretnings Naalakkersuisut), atanissaminnut isumaqatigiissummik nutaamik sanasoqarnissaa utaqqiniarnagu imaluunniit qinersisoqarnissaa piumanagu.
- Tamanna pissutigalugu Partii Naleraq oqaloqatigiinnissamut peqataasinnaanngilaq, taamatut
tukatsigisumik naalakkersuinikkut aqutsisoqarniartillugu, Pele Broberg oqarpoq.
Partii Naleraq suli isumaqarpoq inuiaqatigiit politikkikkut saliisoqarnissaanik pisariaqartitsisoq.