Partii Naleqqap naalagaaffinngornissamut ulluliussaq kinguartippaa

Kalaallit Nunaata 2021-imi naalagaaffinngornissaanut Partii Naleqqap piumasaqaatini taamaatippaa, tamanna partiimi siulittaasup Hans Enoksenip ukiuni arlalinni piumasaqaatigaa.

Kalaallit Nunaanni politikkimi partiit namminiilivinnissamik piumasaqarnerit ilaata, Partii Naleqqap, Kalaallit Nunaata qaqugu naalagaaffinngornissaanut piumasaqaat sakkukillivaa.

Ukiut 300-nngornerat

Partii Naleqqap siulittaasuata Hans Enoksenip siusinnerusukkut oqaatiginikuuaa, Kalaallit Nunaat 2021-imi naalagaaffeqatigiinnermit anilluni naalagaaffinngussasoq. tamannalu Hans Egede Kalaallit Nunaannut tikinneranit ukiut 300-nngornerini pissalluni.

Kalaallit Nunaata naalagaaffinngornissaa aningaasaqarnikkut illersorsinnaasumik tunngaveqartariaqartoq, partiip folketingimut qinigassanngortitaa Pele Broberg, KNR-imut ilisimatitsivoq.

Inuuniarnermi atukkat ajorsineqassanngillat

Naalagaaffinngornissaq pillugu innuttaasut inuuniarnermi atugaat ajorseriartinneqassanngillat, taanna KNR-imut ilisimatitsivoq.

Sapaatip-akunnerata siuliani Future Greenlandimi ataatsimeersuartoqarnerani Torben M. Andersenip, Kalaallit Nunaat naalagaaffinngussappat ilaatigut naalagaaffiup tapiissutaanut aningaasaqarnikkut piumasaqaatit qaqippai.

Naalagaaffimmit tapiissutit 3,8 milliardit koruunit aamma suliassaqarfinni suli tiguneqanngitsuni aningaasartuutit 1,2 milliardit koruunit eqqarsaatigalugit, pisortani allaffissorneq affaannanngortinneqassanngippat imaluunniit akileraarutit marloriaatinngussanngippata, Kalaallit Nunaanni aningaasaqarneq annertuumik qaffanneqaqqaartariaqarpoq.

Inuussutissarsiornermi ineriartornermik pilersitsisoqarnissaa pingaaruteqartoq, taamaalilluni Danmarkimit tapiissutinik pisariaqartitsisoqarunnaariartussasoq, Pele Brobergip KNR-imut nassuerutigaa. Sammisaq taanna folketingimi qinigassanngortitatut samminiarpaa. KNR-imi allaaserisami nunap qaqugu naalagaaffinngorsinnaanerata naatsorsuutigineqarsinnaanera ullulinngilaa.

Powered by Labrador CMS