hashimik eqqussuineq
Partii Naleqqap immikkoortortaqarfiata Hans Enoksen taperserpaa
- Meeqqat inuusuttullu hashimik atornerluinermit ajortisarneqarnerat isiginnaaginnarnianngilarput, kikkut tamarmik tamanna pinnginnissaanut akisussaasuupput, Partii Naleqqap Sisimiuni immikkoortoqarfia allappoq
Aalisarnermut naalakkersuisup Hans Enoksenip hashimik anngiortumik eqqussuinermut akiuniarnermut oqariartuutini akerleriissutaasut attatiinnarpai, inuttallu hashimik eqqussuisut paasineqaraangata kilisaatinik piginnittut aningaasatigut sioorasaaruteqarfigalugit.
Kattuffiit arlallit aamma partiit Hans Enoksenip oqariartuutaanut isornartorsiuipput. Kisianni maanna taperserneqarpoq.
Atuaruk: Enoksen aalajangiusimasoq - akuersissutinut sioorasaarut attakkaa
Suliffeqarfinnut kinguneqartitsineq
Partii Naleqqap immikkoortortaqarfianit siulittaasortik Hans Enoksen taperserpaat.
- Naalakkersuisup Hans Enoksenip suliffeqarfiit akisussaaffitik suliassatillu qasukkarunikkit kinguneqartitsiffigineqarnissaannik oqariartuutai tamakkiisumik taperserpagut, siulittaasup tullia, Malene Ingemann, Partii Naleraq Sisimiut sinnerlugu allappoq.
Atuaruk: Sulisitsisut: Enoksenip siorasaarinera akuerineqarsinnaanngilaq
Ilinniutigissagaat
Partii Naleraq Sisimiut meeqqat inuusuttullu hashimik atornerluinermit sequtserneqarnerannut isiginnaaginnarnianngitsoq, taanna erseqqissaavoq.
- Tamanna pinnginnissaanut kikkut tamarmik akisussaasuupput. Nunatsinni inuiaqatigiittut inuttut toqqammavigut nukittorsarniarutsigit, nutaarsiassani takusimasagut ilinniarfigisariaqarpagut, sukaterinerillu pisariaqartut qulakkeerlugit, uani pineqartoq kisiat pinnagut, kisianni aamma inuiaqatigiinni iliuutsit pinaveersaartitsinerit nalinginnaasut iluaqutaasut, Malene Ingemann oqarpoq.
Atuaruk: Michael Rosing: Sulliviit pillarneqassanngillat
Iliuuseqarneq sukannernerusoq
Kalaallit Nunaanni isaaffinni periutsit sukaterneqartariaqartut, Partii Naleraq Sisimiut isumaqarpoq.
- Nunatsinnut anngiortumik hashimik eqqussuinermut akiuinermut pitsaanerpaamik qulakkeerinnittariaqarpugut, taamatullu aamma suliffeqarfiit tamarmik aqutsinermut tunngatillugu akisussaaffimmik tigusitinneqartariaqarnerat inissaminiissoraarput, peqquneqarnerat aamma kinguneqartarnera pissutigalugu. Kilisaammi hashimik 20 kiilumik nassaartoqarsinnaappat, aqutsisuni aamma kilisaataatilinni pitsanngorsaanissamut inissaqartoq takutitsilluinnarpoq, Malene Ingemann oqarpoq.