isorliunerusut
Partii Naleqqap immikkoortoqarfia: Nuussinissamut akissaqarumallusi sipaaruteqaritsi
Sisimiuni Partii Naleqqap siunnersuutigaa pisortat ingerlatsinerat annertuumik pisariillisarneqassasoq, atorfinnik Nuummit sinerissamut nuussinissamut akissaqarumalluni
Sisimiuni Partii Naleqqap borgmesterit Siumumeersut, ilaatigut Qeqqata borgmesteria Hermann Berthelsen, nersualaarpai siunnersuutigimmassuk suliffiit 600-t ilaatigut Sisimiunut Nuummit nuunneqassasut.
Naligiinnerulerluni
– Sinerissami illoqarfinnut nuussinissamik siunnersuut pitsaasuuvoq tapersersortariaqarlunilu, tamatumuunakkut nuna tamakkerlugu inuiaqatigiinni naligiinnerunermik misigisimaneq nukittorsarneqassammat, tamatta ataatsimut siunissatsinnut pilliuteqaqataalluta, immikkoortoqarfimmi siulittaasup tullia kommunalbestyrelsimullu ilaasortaq Malene Ingemann oqarpoq.
Allaffissorpallaarneq
Partiip immikkoortoqarfia ilanngullugu isumaqarpoq suliffiit pineqartut amerlanerujussuisa takutikkaa Kalaallit Nunaanni allaffissortoqarpallaaqisoq.
– Taamaattumik siunnersuut isigaarput allaffissornerup sutigut tamatigut pisariillisarneqarnissaanut tunngavissaalluartutut, tamatumani suliffiit sapinngisamik ikinnerulersillugit. Teknologiillu tamakkiisumik atorneratigut nuussinissamut aningaasanik sipaaruteqarsinnaavugut, piffissarlu ungasinnerusoq isigalugu allaffissornermit inuiaqatigiinni ineriartortitsinissamut aningaasanik nuussisinnaavugut, siulittaasup tullia erseqqissaavoq.