Partii Naleqqap ataatsimeersuarnissaa kinguartinneqarpoq
Siumut malinnagu Partii Naleqqap ataatsimeersuarnissani kinguartissimavaa, tassani Danmarkimi Europamilu nunani allani Covid-19-ip atugaajartuinnarnera innersuussutigalugu.
Nunami kommunillu akornanni angalanissat killersugaanerannut partiit ilaatinneqannginnerat aalassatsitsisimaqaaq, Siumullu tamanna tusaajumasimanngilaa.
Partii Naleqqap pilersaarutaasutut oktobarip qaammataani ataatsimeersuarnissaraluaminik kingutsitsinerminut pissutaasoq imatut nassuiaateqartippaa:
- Kinguartitsinermut pissutaapput ulluni makkunani nunarsuarmi covid-19-ip atugaajartuinnarnera, minnerunngitsumillu angallannikkut toqqaannartumik angallavitsinni Danmarkimi covid-19-ip atugaanera sillimanarsigaluttuinnarmat, tusagssiorfinnut nalunaarummi allassimavoq.
Kikkut tamarmik assigiimmik pineqartariaqartut
Ilanngullugu allassimavoq:
- Minnerunngitsumik Nunatsinni Naalakkersuisut namminneerlutik nalunaarutaata inuiaqatigiinni assigiinngisitsisumik ilusilikkap kingunerisaanik nunatsinni soqutigisaqaqatigiippassuit ataatsimeersuarsinnaajunnaarsinneqarmata allaallu timersortartorpassuit unammersuarsinnaajunnaarsineqarlutik. Naalakkersuisut imminnuinnaq pingaartillutik nalunaarusiorsinnaanngillat, taamaasiorneq demokratiimik innarliineruvoq, innuttaasummi assigiimmik naligiimmillu pineqartariaqarput, partii oktobarip qaammataani ataatsimeersuassappat pissusissamisuunngitsoq partii isumaqartoq allappoq.
Partiip ataatsimeersuarnissaq qaqugu pissanersoq suli isummerfigisimanngilaa.