Partii isummaminik allannguisoq: Inatsit tunngaviusussaq pillugu Isumalioqatigiissitap atorunnaarsinneqarnissaanut taaseqataasoq
Demokraatit isumaminnik allannguipput maannalu isumalioqatigiissitap matuneqarnissaanut innersuusillutik. Siunnersuutigineqartorli Inatsisartuni amerlanerussuteqartuniit akuerineqanngilaq.
Inatsit tunngaviusussaq pillugu Isumalioqatigiissitat pillugit Inatsisartuni marlunngornermi ualikkut sakkortuumik oqallittoqarpoq. Isumalioqatigiissitami siulittaasuusimasoq Kuupik Kleist tunuarluni nalunaaruteqaqqammersorlu oqallinneq allartinneqarpoq.
Inatsit tunngaviusussaq pillugu Isumalioqatigiissitat oqallisigineqarpoq, Atassutip isumalioqatigiissitat atorunnaarsinneqarnissaanut siunnersuuteqareersorlu. Siunnersuut ukioq kingulleq ukiakkut ataatsimiinermi siullermeerluni suliarineqarpoq.
Siullermeerluni suliarineqarnerani Demokraatit isumalioqatigiissitaq ingerlaannarnissaanut kissaateqarpoq Atassutillu siunnersuutaa itigartinnissaanut piareersimasimallutik.
Suliamik allamik suliaqartoqarnissaanut tatiginninngitsut
Partii qanoq isumalioqatigiissitaq suliaqartarnersoq paasissutissiissutigineqareersorlu isummaminnik allannguivoq. Partiimi siulittaasoq Jens-Frederik Nielsen Sermitsiaq.AG-imut oqaatigaa, sunarpiaq pillugu paasissutissiisoqarsimanersoq oqaatigisinnaanngilaaq, taamaakkaluartorlu isummani oqaatigisinnaallugu:
- Takorlooruminaatippara qanoq isilluni isumalioqatigiissitami taama tukatsigisumi torersaasoqarsinnaanersoq, tamanna sapaatip akunnerata naanerani aalajangerneqarpoq. Taamaammat suliamik allamik atorluarneqarsinnaasumik naammassinnittoqarsinnaanera takujuminaatippara.
- Uagutsinnut paasissutissiissutigineqartut tunngavigalugit isumalioqatigiissitap matuneqarnissaanut tapersersuilluta taasisariaqarsimavugut, Jens-Frederik Nielsen oqarpoq, taassumallu naalakkersuisunut kajumissaarutigaa isumalioqatigiissitami ajornartorsiutaasut pillugit ammanerusumik paasissutissiisoqartassasoq.
Partii namminiilivinnissamut suli suliniuteqartuusoq, Jens-Frederik Nielsenip erseqqissaatigaa.
Piffissamik sivisunerusumik piumasaqartut
Naalakkersuisunut siulittaasoq Inatsisartuni oqallittoqarnerani oqaluttarfimmiippoq. Taassumallu isumalioqatigiissitami unammilligassaqartoq nassuerutigaa:
- Inatsit tunngaviusussaq pillugu Isumalioqatigiissitami assigiinngitsunik unammilligassaqarpat siulittaasoq tunuarniarluni noqqaasuteqarpoq, Múte B. Egede ilaatigut taama oqarpoq.
Naalakkersuisut ukiuni kingullerni millionilikkaanik isumalioqatigiissitamut aningaasaliissuteqartarsimagaluarlutik, isumalioqatigiissitami ajornartorsiutit sorpiaanersut siulittaasup itinerusumik eqqartunngilai.
Taamaakkaluartorlu erseqqissaatigaa isumalioqatigiissitaq ukiup affaanik suleqqinnissamik qinnuteqarsimasoq. Inatsit tunngaviusussaq pillugu Isumalioqatigiissitaq ukioq manna naammassineqartussaagaluarpoq.
Isumalioqatigiissitap matuneqarnissaanut tunngatillugu Atassut taamaallaat Demokraatiniit tapersersorneqarpoq, partiit allat siunnersuut akerleraat.