ukiortaami oqaaseqaat

Partii Inuit kalaalinngorsaaneq nukittorsaqquaat

Partii Inuit ukiumik ataasinngortorsiungajalersut ukiortaami oqaaseqaamminni tikisitanik atuineq isornartorsiorpaat

Partii Inuit siulittaasuat Nikku Olsen ukiortaami oqaaseqaammini tikisitanik atuinermik uparuartuivoq

- Pissutsit ersarilluinnartumik avataanit aqunneqarnermik politikkimi akuersaaginnartunngorsimanermik pissuteqarput.

Taama oqaaseqartoq tassaavoq Partii Inuit siulittaasuat Nikku Olsen arfinilinnik quppernilimmik ukiortaami oqaaseqaateqartoq. Oqaaseqaammi annermik pineqarpoq tikisitanik atuineq aammalu suliffeqarfissuit partiip naliliinera malillugu europamiorpalaarpallaartumik ingerlanneqalersimanerat.

- Royal Greenland Kalaallit nammineerluta aningaasarsiornikkut pingaarnerpaat ilaanni inissisimasoq, tassani RG-p pisortai, qullersaqarfia siulersuisuinilu aqutsisui tamarluinnangajammik nunatsinni najungaqaratilluunniit immikkut aningaasalersorneqarlutik aaqqissuussiffigineqarsimapput. Tamakku saniatigut suliffeqarfissuaq pigisarput Royal Greenland Nunatta avataani inupparpasuarnik suliffissaqartitsisutut aammalu pilersuisutut qaffasissumik inissisimalersimavoq nunatta pisuussutai aalisakkat allallu atorlugit. Uggali maani nunami suliffissaaleqisut amerlatsikkaluttuinnartut. Pissutsit equngalluinnarput, Nikku Olsen uparuaavoq.

Taassuma ilanngullugu oqallinnermi pissusilersortarneq uparuarpaa isumaqarami nikassaarpalaarneq atugaavallaartoq.

Sumiikkaluaruttaluunniit Kalaaleqatigiit akornatsinni inuit nuimalaartut inuinnaalluunniit akornanni immikkuullarilaartumik pisoqaraangat pingaartippallaartarparput iluamik paasisimasaqarani oqallinneq aammalu nakkarsaaneq toqqammavingalugu tarnikkut ikilersuineq, taamaaliornikkullu anersaamik kusanartumik toqutsisarnerput, Nikku Olsen oqarpoq.

Taassuma ilanngullugu uparuarpaa oqallinnermi tusagassiutit inissisimanerat.

Qallunaat tusagassiortut amerlavallaarput
- Tusagassiortugut politikkikkut malersuisartut tassaalersimapput danskit tusagassiortut nunatsinni amerlatsikkaluttuinnartut, kalaalersaat annerusumik kalaallisuumut nutserisut. Tusagassiorneq tamanna kalaallinut tusagassiornerunani danskinut tusagassiornertut nalilerneqartariaqartoq Partii Inuit isumaqarpugut, Nikku Olsen oqarpoq.

Taanna isumaqarpoq kalaalinngorsaanermik oqalunneq ukiorpassuarni tassaasimasoq oqaaseq timitalerumaneqanngitsoq siunnersuutigaalu atuartitsinermi atortut sapinngisamik amerlasuut kalaallisuunngortinneqarnissaat.

- Piniaasaartumik pissuseqarneq allanngortittariaqarparput, tamatumunngalu sapiissuseqarnerusariaqarluta, Nikku Olsen oqarpoq.

Partii Inuit ukiortaami oqaaseqaataat tamakkisoq linkimi talerpiatungaani aasinnaavat

Powered by Labrador CMS