Partii Inuit: Aalisarnermi eqqissisoqarli

Finn Karlsenip Siumumeersup aalisarnermut, piniarnermut nunalerinermullu naalakkersuisutut inatsisartuni ivertinneqarnissaa Partii Inuit taperserniarpaat. Inatsisartut immikkut ittumik ataasinngornermi ataatsimiinneranni tapersiillutik taasiniarput.

Partii Inuit naalakkersuisooqataajunnaarnermik kingorna isornartorsiuisartut Finn Karlsenip ivertinneqarnissaa taperserniarpaa.

- Sinerissap qanittuani aalisarneq ajornartorsiorfiuvoq. Taamaammat aalisartut atugaat pitsanngorsarniarlugit sulineq aallarteqqittariaqarpoq, Partii Inuit siulittaasuat Nikku Olsen oqarpoq.

Karl Lyberth naalakkersuisutut januarip arfernat tunuarpoq kukkusumik paasissutisseereerluni aammalu Aleqa Hammondip inooqataa Tom Ostermann siunnersortimisut atorfinitsikkaluareerlugu.

- Tunuarnera ataqqinassusilimmik pivoq. Kukkussutini nassuerutigai kingulerilu malillugit, Nikku Olsen oqarpoq.