Partii akileraartarnermut siunnersuut pillugu: Siunnersuut ernumanarluinnarpoq
Naalakkersuisunit oqaatigineqarpoq, inatsisimmi amigaateqartoqartoq inatsisissatut siunnersuut nutaaq aqqutigalugu aaqqiiffigineqartussamik, illuatungiliuttutulli partiinit marluusunit Demokraatinit Naleqqamillu akerlianik isumaqarput, siunnersuut Nunatsinni suliffeqarfinni kinguaariit nikittarnerannutajornartorsiutaalersinnaasoq.
Inatsisartuni sisamanngornermi ullup-qeqqata siornatigut inatsisissatut siunnersuut, Naalakkersuisut naapertorlugit akileraartarnermut inatsimmi amigaataasunik aaqqiissuteqartussaq suliaralugu aallartinneqarpoq.
Siunnersuut malillugu ingerlatseqatigiiffimmik atorunnaarsitsinermi iluanaarutit
akileraaruserneqartalissapput. Naalakkersuisut malillugit, tamanna aningaasarsiassatut iluanaarutitulluunniit tunniunneqartarnerannut sanilliullugu aningaasaqarnikkut iluanaarutaanerulersitsisassaaq.
- Ingerlatseqatigiiffiit akileraarutaannik 25 procentimut appaaneq, suliffeqarfinnik atorunnaarsitsinermi akileraarutinik sipaaruteqarnermik anginerulersitsivoq. Iluanaarutisianik akileraarutip nalinginnaasumik 42-44 procentiusup atorunnaarsitsinermilu iluanaarutisiap assigiinngissutaa annertunerulerpoq, taamaalillunilu ingerlatseqatigiiffimmik matusiinnarluni atorunnaarsitsinissaq pilerinarnerulerluni, Aningaasaqarnermut Naalakkersuisoq Naaja H. Nathanielsen (IA) siunnersuummik saqqummiussigami ilaatigut taamatut oqarpoq.
Suliffeqarfinnit sakkortuumik isornartorsiuisoqartoq
Naalakkersuisulli ingerlatseqatigiiffiit qassit ullumikkut atorunnaarsinneqarsimanerannik missingiussamik imaluunniit akileraarutit nutaat nunatta karsianut qanoq isaatitsitigissanerannik saqqummiussaqanngillat.
Akileraartarnissamilli siunnersuut kukkunersiuisarfinnit Grønlands Revisionimit Deloittemillu aamma suliffeqarfinnit arlalinnit ssakkortuumik isornartorsiorneqarsimavoq. Kukkunersiuisartut suliffeqarfiillu aviisimut Sermitsiamut oqaluttuarisimavaat, inatsit nutaaq Kalaallit Nunaanni pingaartumik suliffeqarfinni mikinerusuni kinguaariit nikissinnaanerannut ajornarnerulersitsissasoq. Politikkerit suliffeqarfiutillit nunatta avataaneersunik aningaasaateqarluareersunut tunisiinnartalersissinnaagaat, illuatungiliuttunit oqaatigineqarpoq.
Illuatungiliuttutut partiinit Demokraatinit Naleqqamillu suliffeqarfiit ernummatigineqarput. Demokraatit siulittaasuata Jens-Frederik Nielsenip siunnersuut ernumanartupilussuartut isigaa:
Kritisk overfor manglende konsekvenser
- Namminersorlutik inuussutissarsiortut suliffeqarfiit ingerlalluartut sumiiffimminni nukiinut ingerlatitseqqiinissamut kajumissusaannut annikilleriartitsisussamik siunnersuuteqarneq Demokraatiniit ajornartorsiutigaarput. Suliffeqarfiutillit nunatta avataaneersunik aningaasaateqarluareersunut tunisiinnartalernissaat ernummatissaavoq, partiimi siulittaasoq oqalittoqarnerani oqarpoq.
Peqatigitillugu isornartoqartilluinnarpaa, Naalakkersuisut siunnersuutip aningaasaqarnermut kinguneqaatissaanik naatsorsuissinnaasimannginnerat:
- Suliassavut nalullugit suliaqarpugut, kukkorujussuarsinnaallutalu, Jens-Frederik Nielsen oqarpoq.
Taamatut aamma Naleqqameersoq Pele Broberg isumaqarpoq, taannalu Naalakkersuisut siunnersuutip aningaasaqarnermut kinguneqaatissaanik ilanngussaqaratik saqqummiussinerat pillugu paasisaqarnerunissani anguniarlugu apeqquteqaqattaarluni.
Asii: Isumaqatiginninniarnissamut piareersimavugut
Partiimit naalakkersuisuutitaqartumi Inuit Ataqatigiinnit Naalakkersuisut isumaqatigineqarput akileraartarnermilu inatsimmi amigaataasinnaasut aaqqiiffigineqartussaasut oqaatigalugu. IA-lli oqaaseqartartuata Asii Chemnitz Narupip itisiliilluni oqaatigaa, siunnersuutip Aningaasaqarnermut Akileraartarnermullu Ataatsimiititaliami peqqissaarullugu suliarineqarnissaa pingaaruteqartoq, allannguutaasinnaasullut pillugit isumaqatiginninniarnissamut ammasoqartoq:
- Manna pillugu oqallilluarnissamut naapeqatigiiffiusinnaasunillu nassaarnissamut qilanaarpunga, oqallittoqarnerani oqqarpoq.
Siumumi oqaaseqartartoq Kuno Fenckeri aamma taamatut nipilimmik oqaaseqarpoq:
- Kinguaariit nikinnissaannut immaqa pitsaanerusumik aaqqissuussisoqarsinnaavoq. Inatsisissatut siunnersuutip suliffeqarfinnut qanoq kinguneqaateqarsinnaanera pillugu oqalliseqataarusuppugut, politikkeri oqallittoqarnerani oqarpoq.
Akileraartarnermut atatillugu siunnersuut nalunaaquttap akunnerpassuani oqaluuserineqareerlui, Aningaasaqarnermut Akileraartarnermullu Ataatsimiititaliami suliarisassanngorlugu ingerlateqqinneqarpoq.