Parnaarussivinni sulisut aningaasarsiamik qaffanneqarnissaat nuannaarutigaat

Parnaarussivinni sulisut kattuffiata nuannaarutigaa, Kalaallit Nunaanni inatsisinik atuutsitsineq pitsanngorsaaffiginiarlugu danskit aningaasanut inatsisaat aqqutigalugu 50 millioner koruuninik imikkoortitsisoqarsimanera

Aningaasarsianik qaffaaneq Nuummi parnaarussiviup nutaap tatineqarneranut iluaqutaassaqaaq, Parnaarussivinni sulisut kattuffiat naliliivoq.

Parnaarussivittaarmi ima sulisussaaleqitigivoq, allaat Pinerluuteqarsimasunik Isumaginnittoqarfik immikkoortortanik tamanik ammaasinnaanani. Parnaarussivinni sulisut kattuffiat aamma Kalaallit Nunaanni Pinerluuteqarsimasunik Isumaginnittoqarfimmi pisortaq Naaja Nathanielsen isumaqarput, aningaasarsiakippallaarneq parnaarussivimmi sulisussanik pissarsiniartarnerup ajornartorsiutigineqarneranut pissutaasoq.

49,2 millioner koruuninik immikkut aningaasaliissuteqarnikkut parnaarussivinni sulisut aningaasarsiarissaarnerulernissartik qilanaarisinnaavaat.

Inatsisinik atuutsitsinermut immikkoortitat

49,2 millioner koruunit ukiuni sisamani atugassatut immikkoortinneqarsimapput. Taakku imatut agguataarneqarput

2020: 10 millioner

2021: 13,2 millioner

2022: 13,7 millioner

2023: 12,3 millioner

Aningaasat sumorpiaq atorneqassanersut suli inaarutaasumik aalajangiunneqanngilaq, aningaasalli immikkoortinneqartut kalaallit folketingimi ilaasortaatitaasa marluusut politiit parnaarussivinnilu sulisut aningaasarsiaasa qaffanneqarnissaannik sorsuuteqarsimanerisa tamanna inernerivaat.

Tamanna Parnaarussivinni sulisut kattuffiata nuannaarutigaa.

- Ukiup affaata kingulliup ingerlanerani Parnaarussivinni sulisut kattuffiata tamaviaarluni suliaqarsimanerata angusaqarfiunera nuannaarutigaarput. Aningaasarsiammi qaffanneqarnerisigut parnaarussivinni sulerusussusillit amerlanerulernissaat neriuutigineqarpoq. Tamanna pisariqartinneqarluinnarpoq, Parnaarussivinni sulisut kattuffianni siulittaasoq Bo Yde Sørensen oqarpoq.

Powered by Labrador CMS