Skip to main content

Parnaarussivik matoqqasoq uaniissaaq

Nuummi parnaarussivissaq titartartillugu suliniummut unammisitsinermi Rambøll Danmark ajugaavoq

Nuummi matoqqasumik parnaarussiviliortoqarnissaanik isumaliutissiissutip allanneqarnerata kingorna ukiut 40-ngajaat qaangiuttut ullumi, pinsi sioqqullugu tallimanngornermi, inatsisinik atortitsinermut ministerip Morten Bødskovip, Socialdemokraterne, tamanut saqqummiuppaa parnaarussivik matoqqasoq qanoq iluseqassanersoq sumilu sananeqassanersoq.

- Ullumi ulloq nuannersorujussuuvoq Nuummi parnaarussivimmut matoqqasumut suliniummik ajugaasoq tamanut saqqummiutissagatsigu. Parnaarussivimmik sananissamut ajornakusoortumut eqqarsarluartoqarsimavoq.

Taamatut oqarpoq tallimanngormat qallunaat nalunaaqutaat malillugu ulloqeqqa qaangeraa Københavnimi Den Nordatlantiske Bryggemi immikkut qaaqqusanut 50-inut. Tamakkua ilaatigut tassaapput ilaqutariinnut inatsiseqarnermullu Naalakkersuisoq Martha Lund Olsen, Siumut, kiisalu naliliisussatut komitep qulinik inuttallip siulittaasua William Rentzmann. Inatsisinik atortitsinermut ministeri pisumut oqaluttuarisaanikkut pingaarutilimmut peqataaniarluni takkussimavoq, parnaarussivillu 2017-ip naanerani sanallugu naammassineqassaaq.

Atuaruk "Parnaarussivik matoqqasoq siulleq ilisaritinneqassaaq"

Parnaarussivillu matoqqasoq nunarsuarmi isikkiviginnersaalluni Nuummi mittarfiup tunuani Paradisdalenimi Quassussuarmut qanittunnguami inissisimassaaq. Tassani parnaarussivimmut matoqqasumut 8000 kvadratmeterinik angissusilimmut 76-inullu inissalimmut, 40-t matoqqasumiissallutik 36-llu ammasumiissallutik, sanaartorfissaqqissoq nassaarineqarsimavoq. Tamarmilu qarmamik 6 meterinik portussusilimmik unguneqarsimassaaq.

- Inuianni kalaallini atugaasumik ammasuunissamik kiffaanngissuseqarnissamillu eqqarsarluartoqarsimavoq, aammattaarli parnaarussivimmik isumannaatsumik pilersitsinissaq eqqarsaatigineqarsimalluni, William Rentzmann, komitemi naliliisussami siulittaasuusimasoq, oqarpoq.

Parnaarussivimmi matoqqasumi inuit 60-70-it sulissapput, amerlanerpaat parnaarussivimmi paarsisut uniformillit. Tamatuma saniatigut socialrådgiverit, tarnip pissusianik ilisimassallit psykiaterillu.

- Pitsaasuuvoq Danmarkimi parnaarussat ungasinngitsukkut angerlarsinnaalissammata ilaqqutaminnullu attaveqarneq attassinnaalerlugu. Inuit ilaat ammut isigineqartut pitsaanerusumik atugaqartissinnaalissavagut, aammattaarli unneqqarissumik iliorfigisariaqarpavut, ilaqutariinnut inatsiseqarnermullu Naalakkersuisoq Martha Lund Olsen oqarpoq.

Sermitsiaq.AG-p qanittukkut ajugaasup titartagaa takutissinnaassavaa.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER