Parnaarussat Nuummut ataatsikkut nuussanngillat
Herstedvesterimit Nuummut parnaarussivittaamut parnaarussat qassit nuussanersut februaarip 28-ani paasinarsissaaq. Parnaarussivissaq juunimi ammarneqassaaq, Pinerluttunik Isumaginnittoqarfiup naatsorsuutigaa parnaarussat ataatsikkut nuutsinneqassanngitsut.
Herstedvesterimi parnaarussat pillugit Pinerluttunik Isumaginnittoqarfik januaarip arfineq aappaani ataatsimiipput. Nuummut nuunnissamut inatsisit saqqummiunneqarput kiisalu parnaarussivissami atugassarititaasussat saqqummiunneqarlutik.
- Ataatsimiinneq ingerlalluarpoq. Apeqqutit tulluartut apeqqutigineqarput, Pinerluttunik Isumaginnittoqarfiup pisortaa Naaja Nathanielsen oqarpoq.
Parnaarussat Herstedvesterimiittut ataasiakkaarlugit oqaloqatigineqassapput, tassani Nunatsinnut nuukkusunnersut aperineqassallutik.
- Februaarip 28-at sioqqullugu nuukkusuttut, juunimi Nuummut nuutsinneqassapput, Naaja Nathanielsen oqarpoq.
Malinnaasussat
Nuukkusunnissamik suli parnaarussanit atsiortoqanngilaq. Taamaattoq tallimat qulillu akornanniittut Nuummut matoqqasumut parnaarussivimmut nuukkusullutik oqariartuuteqareerput. Kalaallit Herstedvesterimi katillugit 27-iusut sinneri suli isumaliutersuutigaat ilumut Nuummut nuutsinneqassanerlutik. Parnaarussat qanoq aalajangissanersut paasinarsingajalersoq Naaja Nathanielsen oqarpoq.
Herstedvesterimiittut aalajangerpata nuutsinneqarusunnatik, kingusinnerusukkut aalajangersinnaapput Nuummut nuutsinneqarusullutik.
- Matoqqasumik parnaarussivik ukiuni marlunni atuutereerpat naatsorsuutigaarput parnaarussat amerlanerit nuussasut, tassanimi tusareersimassavaat atugassarititaasut qanoq ittuunersut, Naaja Nathanielsen oqarpoq.
Parnaarussat Nuummut nuutsinneqartut, nooreernermi ukiup affaa qaangiunnerani aalajangersinnaapput Herstedvesterimut uternissamut.