Parnaarussaasartut amerlalluinnartut
Nunat tamalaat akornanni »parnaarussaasartut amerlassusaannik allattorsimaffimmi« nutaami Kalaallit Nunaata innuttaasunik amerlasuunik parnaarussassannngortitsisarnera uppernarsarneqarpoq: - Parnaarussiviit pinerlunniartarnermut iluaqutaanngillat, ilisimatuutut akuerisaasoq oqarpoq
Kalaallit Nunaat innuttaminik “parnaarussisannginnissamik pillaasannginnissamillu” tunngaviusumik anguniagaqaraluarluni nunani killerni innuttaasut amerlassusaannut sanilliullugu innuttaasunik amerlanerpaanik parnaarussassanngortitsisartut ilagaat.
Aviisi AG allappoq.
Tuluit Nunaanni Londonimi Birkbeck Universitetimi pinerluttulerinermut inatsisinillu atuutsitinermut ilisimatusarfik Institute for Crime & Justice nunat sorliit parnaarussassanngortitsisarnermik atuinerpaanerannik allattorsimaffimmik ukiumoortumik nutarterinermik – The Word Prison Briefimik taaneqartartumik – suliarinnittuusarpoq.
USA allattorsimaffimmi nutaami qullerpaatut inissisimavoq, nunat ilaatigut makkua tullersortigalugit: El Salvador, Rwanda, Cuba aamma Rusland.
Qullerpaatut inissisimasut tallimararterutaat
Allattorsimaffimmi nunat nunallu namminersortitat 222-t inissitsiterneqarsimapput – Kalaallillu Nunaat normu 48-tut inissisimavoq, tassa qullerpaatut inissisimasut tallimararterutaat qanittuararsuullugit.
Nunat avannarliit allat allattorsimaffimmi appasinnerujussuarmi inissisimapput: Danmark Norge peqatigalugu normu 184-imiippoq, Sverige normu 191-imiilluni Finlandilu normu 203-miilluni.
Ilisimatusarfimmi lektori, ph.d. Annemette Nyborg Lauritsen – nunatsinni pinerluuteqarsimasunut inissiisarfinnut pinerluttulerinermullu tunngasuni ilisimatusaatiginninnermi siuttuusoq – naapertorlugu, allattorsimaffik Kalaallit Nunaannut atatillugu pissusiviusunik ersersitsinngilaq, tassa Herstedvesterimi parnaarussat ilanngullugit naatsorsorneqarsimanngimmata.
Annemette Nyborg Lauritsenip apersorneqarnera tamaat AG-mi atuaruk – una toorlugu: