Parisimi oqaluffissuaq Notre Dame ikuallattoq

Oqaluffissuup tusaamasap ikuallarujussuarneranut suna pissutaanersoq suli nalunaarutigineqanngilaq.

Parisimi oqaluffissuaq Notre Dame ataasinngornermi unnukkut ikuallallerpoq.

Oqaluffissuaq Frankrigimi illoqarfiit pingaarnersaata ilisarnaataasa ilagaat.

Frankrigimi tv-qarfimmit assilisani takuneqarsinnaavoq oqaluffissuaq innerup poorsimagaa, ikuallattoqarneranulli suna pissutaanersoq politiinit suli nalunaarutigineqanngilaq, nutaarsiassaqartitsivik dpa allappoq.

Oqaluffimmi nutarterinermik suliaqartoqarpoq, sulinerullu tamatuma nalaani ikuallattoqalersimasinnaasoq, qatserisartut aviisimut Libérationimut ilisimatitsissutigaat.

Takunnittut malillugit oqaluffik nal. 18.50 ikuallalerpoq.

Parisimi borgmesterip, Anne Hidalgop, "ajorluinnartumik ikuallattoqarnera" oqaatigaa.

Tv-qarfik BFMTV naapertorlugu inuit qeqertamit Notre Damep inissisimaffigisaanit Seinenimit qimagussortinneqarput, isumannaallisaanermilu aamma killeqarfiliortoqarsimalluni.

Powered by Labrador CMS