Parisimi isumaqatigiissutip nalilersorneqarnissaa utaqqimaarneqartoq
Naalakkersuisut Parisimi isumaqatigiissummut Nunarput ilanngutissanersoq suli isummerfiginngilaat.
FN-ip sila pillugu sulisitaasa nalunaarusiaa qanittukkut saqqummiunneqarpoq, nalunaarusiamilu sila pissusaata allanngoriartorneranut atatillugu siulittuutit nuanninngitsut arlallit allaaserineqarsimallutik.
Nalunaarusiamut atatillugu IA sinnerlugu Inatsisartuni ilaasortaq Maria Simonsen silap pissusaa pillugu arlalinnik Naalakkersuisunu apeqquteqarsimavoq.
Ilaatigut paaserusussimavaa, 2015-imi Parisimi isumaqatigiissummut Nunatta ilanngunnissaa qaqugu pissanersoq Naalakkersuisut naatsorsuutigineraat. Isumaqatigiissuteqarnikkut anguniagaavoq, suliffissuit atuutilinnginneranni 2 graderit "ataallugit" nunarsuup kiattarsimaneratut kiatsigisaleqqinnissaa anguniarlugu, silaannaap kissakkiartuinnarnerata killilerneqarnissaa.
Nunarput nunap ilaanut tunngasumik nangaassuteqarpoq isumaqatigiissummullu ilaanani. Nunattalu isumaqatigiissummut ilaalernissaa qanittukkut pisinnaagunanngitsoq, Nunanut allaut, Inuussutissarsiornermut, Niuernermut Silallu pissusaanut Naalakkersuisoq Pele Broberg (N) akissuteqaammini ilisimatitsivoq.
Naliliineq: Silap pissusaa pillugu isumaqatigiissut nunamut akisuallaarsinnaasoq
- Kalaallit Nunaat Parisimi isumaqatigiissummut qaqugu ilanngutissanersoq ilanngutissanersorlu Naalakkersuisunit suli inaarutaasumik isummerfigineqanngilaq. Parisimi isumaqatigiissummut ilanngutissagutta kingunerisinnaaasaat pillugit nalilersuineq Naalakkersuisut aallartereerpaat, Pele Broberg Mariia Simonsenimut allappoq.
Parisimi isumaqatigiissutissaq 2015-imi isumaqatiginninniutigalugu naammassineqarmta, taamanikkut Naalakkersuisuusut isumaqatigiissummut nangaassuteqarput, isumaqaramik Kalaallit Nunaata suliffissuaqarnikkut ineriartorsinnaatitaanera qulakkeerneqarsimanngitsoq.
Nunammi isumaqatigiissummut ilaasut anguniagaraat, ukimut 1990-imut sanilliullugu CO2-mik aniatitsineq annikillisinneqassasoq, Kalaallillu Nunaanni assersuutigalugu aatsitassarsiorfinni suliaqartoqarnerulerpat, Kalaallit Nunaat isumaqatigiissummik malinninniarnissamik ajornartorsiuteqalersinnaavoq.
Taamanikkut nunanut allanut naalakkersuisuusup Vittus Qujaukitsup 2015-imi ajuusaarutigaa, isumaqatigiissummi nunap inoqqaavi immikkut eqqarsaatigineqarsimannginnerat.
- Atuarlugu imaannaanngitsuusoq
Pele Broberg Maria Simonsenimut aamma allappoq, silap pissusaata allanngoriartornera pillugu nalunaarusiaq nutaaq Naalakkersuisut ilungersunartutut isigigaat:
- Nalunaarusiaq atuarlugu imaannaanngitsuuvoq, annertuumillu ernummateqarnissamut pissusissaqartitsilluni, Broberg Naalakkersuisut nalunaarusiaq tusaatissatut tigusimagaat oqartoq oqarpoq.
Kalaallit Nunaata nukimmik mingutsitsinnginnerusumik atuisarnissaa eqqarsaatigalugu, Naalakkersuisut nunami erngup nukinganik nukissiuuteqarnissaq nunani tamalaani aningaasaliissuteqartartunut nittarsaanniarpaat, aningaasaliissuteqartartut 'akikinnerusumik mingutitsinnginnerusumillu nukissiuuteqarnissaq' ujartortarpaat.