ataatsimeersuarneq

Parisimi ataatsimeersuarnermi Qujaukitsoq peqataassaaq

Aningaasanut, aatsitassanut aamma nunanut allanut naalakkersuisoq Vittus Qujaukitsoq (S), Naalakkersuisut sinnerlugit silap pissusaa pillugu ataatsimeersuarnermut COP21-mut Parisimi peqataavoq

Aningaasanut, aatsitassanut aamma nunanut allanut naalakkersuisoq Vittus Qujaukitsoq (S), silap pissusaa pillugu Parisimi ataatsimeersuarnermi peqataassaaq

FN-ip nunani tamalaani silap pissusaa pillugu ataatsimeersuarnera Frankrigip illoqarfiisa pingaarnersaanni Parisimi ullumikkut aallartippoq 11. decemberilu ilanngullugu ingerlanneqassaaq.

Aatsitassanut nunanullu llanut akisussaasuusoq Vittus Qujaukitsoq (S) Naalakkersuisut sinnerlugit silap pissusaa pillugu ataatsimeersuarnermut COP21-imut Parisimi arfininngorneq aallarnerfigalugu peqataassaaq.

Isumaqatigiissutissat eqqoruminaattut
Parisimi silap pissusaa pillugu isumaqatigiissuteqarnermi silap pissusaata allanngoriartornerata akiorniarnissaanut ataatsimoorussamik nunani tamalaani suliniuteqarnissaq, gradinik marlunnik anguniagaqarnerup naammassisinnaanissaanut aalajangiisuulluinnartumik pingaaruteqartoq, qulakkeerneqassaaq. Gradinik marlunnik siunnerfeqarneq nunarsuaq tamakkerlugu agguaqatigiissitsineruvoq, aammalu Issittumi sumiiffiit gradinik marluk qaangerujussuarlugu kissatsinnerat misigineqartussaasoq silap pissusaanut ilisimatuut maannangaaq oqaatigereerpaat.

- Suleqataasut gradinik marlunnik anguniagaqarnermik qulakkeereqataasinnaasumik, Parisimi anguniagaqarfiusumik aammalu nunarsuaq tamakkerlugu isumaqatigiissuteqarnissaat aalajangiisuulluinnartumik pingaaruteqarpoq. Silap pissusaanut isumaqatigiissummi nutaami nunanut tamaginnut siuariartortitsinissamut assigiimmik periarfissiisoqarnissaa, aammalu nunat gassinik silaannarmik kissatsitsisartunik aniatitsinermut annertunerpaamik akisussaasuusut aammalu pisinnaasaqarnerusut, silap pissusaata allanngoriartorneranik akiuiniarnermi maligassiuillutik siuttuunissaat, Kalaallit Nunaannut aamma pingaaruteqarpoq, Vittus Qujaukitsoq oqarpoq.

Silap pissusaata allanngoriartornerani pisussat eqqoriaruminaattut, aammalu ilusiliineq qanoq ittoq suleqataasut isumaqatigiissutigissaneraat aammalu isumaqatigiissuteqartoqassappat tamanna qanoq isikkoqarumaarnersoq, suli nalunartoq taanna isumaqarpoq.

Annikillisitsineq
- Kalaallit Nunaat ukiuni qulikkaat kingulliit ingerlaneranni, Kalaallit Nunaanni erngup nukinganik atuinermi annertoorujussuarnik aningaasaliivoq, tamatumalu Kalaallit Nunaanni gassinik silaannarmut kissatsitsisartunik aniatitsineq malunnaatilimmik annertuumik killilersimaarpaa, Vittus Qujaukitsoq erseqqissaavoq.

Kalaallit Nunaat nukissiamik ataavartumik atuinini aqqutigalugu gassinik silaannarmut kissatsitsisartunik aniatitsinerup annikillisinneqarneranik annertuumik iluatsitsilluni angusaqareerpoq. Taamaalilluni Nukissiorfit innaallagiamik kiassarnermillu ataatsimut katillugu tunisaqartarnerata 70 procentia sinnerlugu erngup nukinganit ataavartumik nukissiornermeersuusarpoq.

COP21-imut atatillugu Vittus Qujaukitsup naatsorsuutigaa, Kunngeqarfik Danmarkip ataatsimoortuni isumaqatiginninniarnermi peqataatitaanni peqataanerup saniatigut, aaqqissuussinerni arlalinni oqaseqarnissani, ilanngullugu 'Arctic Encounter in Paris', tassaasoq Issittoq sammillugu nunani tamalaani ataatsimeersuarneq, ulloq 12. december 2015 pisussaq.

Eqqissisimatitsinermut Avatangiisinullu Ataatsimiititaliami ilaasortat aamma COP21-imi peqataassasut naatsorsuutigineqarpoq.

Powered by Labrador CMS