paragraf 37
Paragraf 37-mik apeqqutit pillugit saqitsaanneq annertusisoq
Partiip illuatungiliuttup Demokraatit aamma attaveqatigiinnermut naalakkersuisup Erik Jensenip akornanni nipi sakkortusivoq. Erik Jensenip nalunaarasuartaateqarnermut imaatigullu kabelimut tunngasut apeqqutit 50-t missaanniittut akiumannginnerinik tamanna pissuteqarpoq.
Demokraatinut akissuteqarnermini siullermi novembarip 20-anni Erik Jensenip itigartitsinini ima tunngavilerpaa, ''katillugu apeqqutit 50-it sinneqarmata paasissutissanillu kissaateqartoqarmat (...) Naalakkersuisunut apeqquteqarnerit suliarineqarnissaannut najoqqutassiarineqartut, Inatsisartut Suleriaasianni allassimasut naammassineqarsimanngillat''.
Nassiunneqaqqittut, kisianni immikkoortillugit
Tamanna tunngavilersuut Demokraatit siulittaasuannut, Randi Vestergaard Evaldsenimut, narrujuumminarpoq. Taamaammallu apeqqutit nassiuteqqippai, kisianni maanna paragraf 37-nut qulinut agguarlugit.
- Naalakkersuisut akissutaat apeqqutinik arlalinnik qaffatsitsipput ilaatigut Naalakkersuisut akissutaanni paasissutissat eqqortut amigaataammata, Randi Vestergaard Evaldsen tusangiasaarerpalulluni allappoq.
- Inussiarnersuungattali Naalakkersuisut ikiukuttoorsinnaavagut. Taamaattumik matumuuna Inatsisartunut ilaasortaq Randi Vestergaard Evaldsen kisimiilluni apeqqutit saqqummiutissavai kiisalu aamma apeqqutigut immikkoortitaarlugit saqqummiutissavagut. Taamatut ilioratta neriuppugut Naalakkersuisut paasisinninnissaannut ikiorsimassallutigit, partiimi siulittaasoq allappoq, taassuma neriuutigaa, ''Naalakkersuisut paasisinninnissaannut ikiorsimassallugit''.
Ullut qulit qaangiutsinnagit akissuteqassasut
Paragraf 37 naapertorlugu apeqqutit qulit tamarmik ullormi tassani nassiunneqarmata, naalakkersuisoqarfik akissuteqarnissaminut ullunik qulinik periarfissaqarpoq.
Erik Jensenip siullermik Demokraatinut akissuteqarnermini ilisimatitsissutigaa, taakku apeqquterpassuit akissuteqarfiginissaanut itigartitsinissamik aalajangerneq Naalakkersuisut siulittaasuat Kim Kielsen peqatigalugu aalajangerneqarsimasoq.
Apeqqutit tamaasa uani linki toorlugu atuarsinnaavatit: Erik Jensen Demokraatinut akissuteqarusunngitsoq