Paquminartut pillugit isiginnaagassiaq nipilersuutitaqartoq
Rappertartoq Josef Tarrak-Petrussen isiginnaagassiornermillu ilitsersuisartoq Pipaluk Kreutzmann Jørgensen isiginnaagassiaminnik takutitsinissaminnut piareerput. Josefip albumiliaa Tarrak isiginnaagassiami aallaaviussaaq.
Isiginnaagassiaq nutaaliaasoq, isiginnaagassiornermik ilitsersuisumit Pipaluk Kreutzmann Jørgensenimit aamma rappertartumit Josef Tarrak-Petrussenimit suliarineqartoq, unnugu takuteqqaarneqassaaq.
Nipilersorneq tunngavigalugu isiginnaagassiaq, Josef Tarrak, Josefip albumiliaanik juunimi ukioq manna saqqummersumik aallaaveqassaaq, Josef Tarrak-Petrussenillu inuuneranik oqaluttualiaalluni. Kalaallit Nunaanni ullumikkut pisartut soqutiginarluinnartumik saqqummiunneqassapput. Katuaq tusagassiutinut taama nalunaaruteqarpoq.
- Isiginnaagassiap sakkortusinnaanera isiginnaartussat natsorsuutigissavaat. Pissutsit paquminarsinnaasut sammissavagut. Kalaallillu amerlanerpaartaasa misiginikuusaat aamma ilimagineqarsinnaapput. Misigissutsit kalaallinit ilisarineqarsinnaasut aqqusaarneqassapput, Josef Tarrak-Petrussen Sermitsiaq.AG-mut oqaluttuarpoq.
Ataataqarani inuuneq
Josef Tarrak-Petrussen inoorlaajunermini anaanani ataatanilu marokkominngaanneersoq najorpai. Ataatsimik oqartoq angajoqqaavi inooqatigiikkunnaarput, taassumallu kingorna ataataqarani peroriartorpoq.
Taanna Sermitsiaq.AG-mut oqaluttuarpoq ataatani siornali ujarniarlugu misiliisalersimalluni. Apeqqutit akissutissarsineqarsimanngitsut arlallit apeqqutigerusuppai.
- Naluara sooq ujarnissaanut aalajangernerlunga. Maanna erneqarpunga panissiaqarlunga, ataatagalu ittunngornikuuvoq (aataa, aaqq.) Taassuma saniatigut apeqqutissaqarpunga suli akineqanngitsunik. Naluaraluunniit ataataga suli uumanersoq, oqaluttuarpoq.
Pissangasoq
Isiginnaagassiaq album ataatsitut atasutut suliaasoq aallaavigalugu isiginnaagassiaavoq. Albummip immiunneqarnerata nalaani isiginnaagassiornermi ilitsersuisoq Pipaluk Kreutzmann Jørgensen tusarnaarsimavoq, erinnallu aallaavigalugit isiginnaagassiornissaq taassuma isumassarsiaraa.
- Taamanili isiginnaagassiorluta aallatippugut. Kiisami takutissinnaalerparput, pissangavungalu, Josef Tarrak-Petrussen oqarpoq.
- Isiginnaartartut Tarrak saqqumilaartartoq takussavaat, aammali inuk Josef takussallugu.
Isiginnaagassiaq Katuap paarlersuani unnugu 21.00 takutinneqassaaq, isiginnaariallu aqqanilinnik ukioqalereersimanissaat piumasaqaataavoq.
Nipilersukkamini Josef Tarrak-Petrussenip nuna najugarisani assigiinngitsutigut apeqquserpaa, nunaminillu avataaniit takunnissinnaassuseqarluni. Nipilersukkat immiussisitsisartoq Aqqalu Berthelsen suleqatigalugu, Peter Lyberthilu siunnersortigalugu pilersinneqarput.