Paneeraq Siegstad Munk biskoppinngorpoq
Biskoppimut qineqqusaarnermi soraarummeerusiami peqquserluttoqarsimaneranik pasillerneqarsimagaluartoq Paneeraq Siegstad Munk, biskopimut qinersinermi qinerneqarnersaavoq. Taamaasilluni taanna Kalaallit Nunaata Biskopeqarfiani bikopissatut toqqarneqarpoq.
43-nik ukiulik Paneeraq Siegstad Munk Attumeersoq Kalaallit Nunaanni biskoppinngorpoq.
Namminersorlutik Oqartussat tusagassiutinut nalunaarummi allapput.
Septemberip 2-ni qinersisinnaatitaasut Kalaallit Nunaata biskopissaanik qinersipput, qinersinermilu amerlanerussuteqartut Paneeraq Siegstad Munk Kalaallit Nunaata Ilagiivisa ukiuni aggersuni ilusilersornissaa kissaatigaat. Taamaasilluni Sofie Petersen biskopitut kingoraartussanngorpaa.
Naalakkersuisumit pilluaqquneqarpoq
- Naalakkersuisut Paneeraq pilluaqqungaarpaat, Kalaallit Nunaannilu Ilagiit pillugit suleqatigiinnissaq ineriartortitseqataanermilu suleqatigiinnissaq qilanaaraat, ilageeqarnermut naalakkersuisoq Karl Frederik Danielsen tusagassiutinut nalunaarummi allappoq.
2001-imi Ilisimatusarfimmi teologimi bachelorinngorpoq, 2017-imi teologimi Københavns Universitetiani kandidatinngorniarnini naammassivaa.
Decembarip aallaqqaataanit atuutilissaaq
2004-miilli Paneeraq Siegstad Munk kandidatimut atuarnini unitsikkallarlugu palasitut Kalaallit Nunaanni sulilerpoq. 2004-mi palasitut sulinissaminut akuerisaavoq, illoqarfinnilu assigiinngitsuni arlalinni palasiusarsimalluni 2017-imilu Provsteqarfik Kujataani provstinngorpoq.
Biskopi nutaaq atorfimmini 1. december atuutilissaaq, biskopitulli ivertitsinissaq pisarnermisut ingerlanneqarsinnaanngornissaata tungaanut kinguartinneqarpoq.
Paneeraq Siegstad Munk ilinniakkaminik naammassinneranut atatillugu peqquserlussimasutut biskoppip allaffianit pasinneqarsimasoq aviisi Sermitsiaq tallimanngormat allappoq.
Pasilliutigineqartulli Paneeraq Siegstad Munkimit aamma Ilisimatusarfiup rektorianit, Gitte Adler Reimerimit, ilumuunnginnerarneqarput.