Panam 2018
PANAM-imut immikkut tapiissuteqarnissamut aalajangiinissaq
PANAM 2018 immikkut 1,5 million koruuninik tapiiffigineqassanersoq ullumi tallimanngornermi Kommuneqarfik Sermersuumi Aningaasaqarnermut Inuussutissarsiuteqarnermullu Ataatsimiititap aalajangissavaa
Kalaallit Nunaanni assammik arsaattartut Kattuffia (GHF) PANAM2018 ingerlanneqarnissaanut atatillugu kommunimut 1,5 million koruuninik immikkut tapeqqulluni qinnuteqaqqissimavoq.
- Qinnuteqaammut toqqammavigineqarput, siusinnerusukkut aningaasartuutissat missingersuusiarineqarneranut tunngavissatut aalajangersakkat allanngorsimanerat. Tapiissutinik arlaqarnernik pisariaqartitsineq peqquteqarpoq aningaasarsiornermut tunngavissatut siunniussat ilaasa piviusunngunngitsoornissaat. Aningaasartuutit ilaatigut annertuumik qaffariarsimapput, aamma unammersuarnissaq ilimagisamit niuerutigineqarnissaminut naleqarpallaarsimanngilaq, naak missingersuusiornermi tamanna naatsorsuutigineqarsimagaluartoq, Aningaasaqarnermut ataatsimiititap oqaluuerisassaani allassimavoq.
Aamma atuaruk: Panam 2018 aningaasaqarnermut ilungersortitsivoq
Kommunip karsianit aningaasalersorneqassasoq
Meeqqanut Atuarfeqarnermullu Ingerlatsiviup Aningaasaqarnermut Inuussutissarsiuteqarnermullu Ataatsimiititamut akuereqqullugu innersuussutigaa, aningaasallu immikkut aningaasaliissutitut kommunip karsianit aaneqassasut, tamanna peqquteqarpoq Ingerlatsiviup 2018-mut missingersuutinut siunertamut aningaasartuutissanik immikkoortitsisimannginnera, oqaluuserisassami allassimavoq.
Qinnuteqaat akuerineqassappat suliaq Kommunalbestyrelsimut akuerisassanngorlugu ingerlateqqinneqassaaq.
Isorinninneq
Aningaasaqarnermut Allatseqarfik suliamut isorinnilluni naatsumik oqaaseqarpoq.
- Aningaasaqarnermut Allatseqarfiup maluginiarpaa ilassutitut aningaasaliissutit suliarineqarneranut atatillugu ilanngunneqarsimanngitsoq, tamannalu naapertuutinngilaq.
Suliaq ullumi kingusinnerusukkut kommunip Aningaasaqarnermut Inuussutissarsiuteqarnermullu Ataatsimiititaata oqaluuserissavaa. Suliaq ippassaq oqaluuserineqartussaasimangaluarpoq, kisiannilu kinguartinneqarsimalluni.
Aamma atuaruk: Panam-ip Royal Unibrew aningaasaliisartutut isumaqatigiissuteqarfigaa