Panam 2018 aningaasaqarnermut ilungersortitsivoq

Nunat tamalaat akornanni assammik arsaalluni unammersuarnissamut 2 million koruunit Kommuneqarfik Sermersuumit pissarsiarereersimavai, taakkuli naammaqqajanngitsut, Meeqqanut Atuarfeqarnermullu Ingerlatsiviup oqaluuserisassaani allassimavoq.

Ikioqquneq

Assammik arsaattartut kattuffiata, unammiuaarnissap ingerlanneqarnissaa pillugu Sermersuup 1,5 million koruuninik aningaasaleeqqinnissaa qinnutigisimavaa.

Aaqqissuussinissamut missingersuutit piviusorsiortuunnginneri, aningaasanik amerlanerusunik qinnuteqarnermut pissuteqarpoq. Assersuutigalugu kattuffiup unammersuarnissaq annertuallaamik nalilersimavaa, aningaasaliisartunilli amerlasuunik pissarsisimanani. Taassuma saniatigut Mexicomiit Panamamiillu peqataasut angallanneqarnissaannut aningaasartuutissat malunnaatilimmik qaffariarsimapput.

- Kalaallit Nunaata unammersuarnissamut aaqqissuussinissaata piviusunngortinneqarneranut piumasaqaataasut ilagaat Amerika kujallermiit, Amerika qiterlermiit kiisalu Amerika avannarlermiit peqataasussat Mexico-miit/Panamiit Nuummut timmisartumik attartornikkut ingerlanneqarnissaat qulakkeerneqassasoq. Tamannalu naatsorsuutigisamit marloriaammik akeqassasoq paasineqarpoq. Taassumalu saniatigut unamminarsimavoq timmisartumik amerlasuunik ilaasoqarsinnaasumik pissarsinissaq, tamannalu aamma GHF-p aningaasartuutaanut annertusaataasut ilagaat. Maannakkumut timmisartumik angallassinissat aningaasartuutissanit kisiartaapput, Meeqqanut Atuarfeqarnermullu ataatsimiitami politikerinut saqqummiussami allassimavoq.

Aaqqissuussamut aningaasartuutissatut 15 million koruunit missingersuusiarineqarsimapput taakkunanngalu 7 million koruunit tungaanut timmisartuussinerinnarnut atorneqassasut, allassimavoq. Inissiinermulli 3,2 million koruunit.

Isornartorsiuinerit

Ingerlatsiviup qinnuteqaat akuereqqullugu politikkerinut saqqummiuppaa, kingornalu kommunip aningaasaqarnermut ataatsimiititamut nassiullugu, tassanngaanniilli isornartorsiuinermik oqaasertaliipput.

- Meeqqanut Atuarfeqarnermullu Ingerlatsiviup ilungersornartutut isigaa, qaammatit arfineq pingasut qaangiutiinnartut naatsorsuutigineqarmat aningaasat 5,0 mio. koruuningajaat amigaatigineqartut, taakkulu saniatigut aarlerinartortaqarluni suli 1,5 mio. koruunit amingaatigineqarnissaat. Taamaattoq Meeqqanut Atuarfeqarnermullu Ingerlatsiviup oqaatigerusuppaa, ingerlatsinermut komitiip kiisalu Kattuffiup aningaasaqarniarnertik ilisimaaralugu, tassani ilanngullugit tapiissutitut isertitassatullu naatsorsuutigineqarsimasut allanngornerat ilisimaaralugit, iliuuseqarnerat ersarimmat. Soorlu Kattuffiup aalajangersimagaa sammisassaqartitsinerit annikillineqassasut aningaasartuutissat annikillisarniarlugit, politikkerinut innersuussutigineqartumi allassimavoq.