Pan Am-imut peqataasoq: VM angunngikkutsigu iluatsinngitsoornerussaaq

Sermitsiaq.AG-p titarnerup killingani arsartartoq, 31-nik ukiulik Eqalunnguaq Kristiansen, kalaallini Pan Am-imut peqataasussat ilaat oqaloqatigaa.

Nunarput kingullermi nunarsuarmi pissartanngorniunnermut peqataammat taanna peqataavoq.

- Nunarsuarmi pissartanngorniunnermut peqataaqqikkusullunga ilaquttakka oqarfiginikuuakka, tamannalu eqqarsaatigiinnarlugu timersuummut piumassusera annertuserujussuarpoq. Nunatsinnilu Pan Am-ileratta unammisartut tamarmik sungiusarluarput, taanna oqarpoq.

- Sooruna nunarsuarmi pissartanngorniunnermut peqataaqqikkusuttutit?

- Peqataalluni misigisaq annertuvoq, taamanilu inuusuttuararsuuvunga, tassanilu misilittagaqarpianngilanga. Maanna misilittagaqalernikuuvunga, iligiinnullu tunniussassaqarluarpunga. Soorunami aamma unammersuarneq misigeqqikkusuppara, Eqalunnguaq Kristiansen akivoq.

Sapaatip-akunneranut arfinileriarluni sungiusartartoq

Taamaammat Amerikap Nunavittaani Pissartanngorniunnermi eqqortumik pitsaassuseqarniarluni ukioq ataaseq kingulleq sungiusarluartarpoq.

- Septembarimili ilungersorlunga sungiusarnikuuvunga. Sapaatip-akunneranut pingasoriarlunga GSS-imi sungiusartarpunga, tamatuma saniatigut aamma sapaatip-akunneranut pingasoriarlunga timigissartarfimmiittarlunga. Pitsaassuseralu eqqorluarlugu misigisimavunga. GM-ip nalaani pitsaavallaanngilanga, kisianni maanna Pan Am-imut piareersimasutut misigisimavunga, titarnerup killingani arsartartoq oqaluttuarpoq.

Pan Am-imilu unamminissaminut qilanaarpoq, taanna juunip 16-anni aallartissaaq.

- Isiginnaartutta saanni isertitsilluni qanoq nuannertigissanersoq isikka matugaangakkit takorloortarpara. Taamaattumik Inussivik unamminitsinni tamani ulikkaaqqasarnissaa neriuutigaara, isiginnaartut uagutsinnut kivitseqataasussaammata, Eqalunnguaq Kristiansen erseqqissaavoq.

Tuiminik ajoquteqarsimasoq

2008-mi tuimigut talerperlikkut ajoquteqarsimagaluarpoq, tamannalu pissutigalugu assammik artartarnini unitsikkallartariaqarsimallugu.

- Ajornerpaammat tuera kivissinnaanikuunngilara. Ukiuni pingasuni assammik arsartarnikuunngilanga, kisianni iligiinneq maqaasinikuuara, timersornerlu iluaqutitut atortarpara. Arsaaffimmi sakkortusinnaasarpunga piumassuseqartorujussuugama, ajugaajuaannarusullungalu, taanna oqarpoq.

Iliminut tatiginnilluartoq

- Nunarsuarmi pissartanngorniunnermut anngutinngikkussi iluatsinngitsoornerussava?

- Aap. Uannut iluatsinngitsoornerussaaq, qularinngilara aamma ilikka taamatut eqqarsartut. Uanga nammineq isumaga naapertorlugu anngunnissamut periarfissagissaarpugut. Uannut ilinnullu tatiginnittorujussuuvunga, tassami sapinngisarput tamaat nunaqqatigut tunuliaqutaralugit sukataarutta qanorluunniit pisoqarsinnaavoq, Eqalunnguaq Kristiansen oqarpoq.