Pan Am-imut aningaasat atorneqartussat qulakkeerneqarput
Assammik arsarnermi unammiuaarnissamut atatillugu aningaasartuutigineqartussat tamarmik akilerneqarput. Unammersuaarnermut ataqatigiissaarisoq ilisimatitsivoq
Assammik arsarluni VM-imut anngunniunneq Nuummi ingerlanneqartussaq sapaatit akunneri pingasungajaat qaangiuppata aallartissapput.
Nunatut aaqqissuussinermut 15 million koruunit atorneqartussaapput, tamarmik qulakkeerneqarsimasut unammersuaarnerup ataqatigiissaarisua Poul Petersen Sermitsiaq.AG-mut oqarpoq.
- Aningaasaliisunik ujaasiunnaareerpugut, Poul Petersen Sermitsiaq.AG-mut oqarpoq.
Unammersuaarnermi aningaasaqarnikkut sinneqartoorfiussanersoq amigartooruteqarfiussanersorluunniit isiginnaariartussat apeqqutaasussaasut oqarpoq.
Unammisartut tamarmik Nunatsinnukaannerat 7 million koruuneqarpoq, najugaqartinneqarneri 3,2 million koruuneqarluni.
Pan Amerikami unammersuaarnermi nunat aqqaneq marluk peqataassapput, tassani angusarissaarnerit pingasut nunarsuarmi pissartanngorniunnissamut Danmarkimi Tysklandimilu januaarimi pisussami anngutissapput.