Pan Am-ertoqannginnerani: Timersornikkut misigisara pikkunarnerpaaq
Pan Amerikami pissartanngorniunneq arfininngorpat tulliani aallartissaaq. Kalaallit unammisartut unamminissamut qilanaalereersinnaasut nunanut allanut unammisartuusimasoq Carsten Olsen oqarpoq
- Marloriarlunga VM-eqataanikuuvunga, kisianni timersortartutut misiginikuusanni pikkunarnerpaaq tassaavoq Nunatsinni unammigatta.
Assammik arsarnermi nunanut allanut unammisartuusimasoq Carsten Olsen Sermitsiaq.AG-mut oqarpoq. 2001-mi 2003-milu VM-eqataavoq. Ullut aqqaneq-marluk qaangiuppata Pan Am aallartissaaq, tassani nunat aqqaneq-marluk VM-imut anngunniutissapput.
- Savalimmiormiunut unammigatta timersortartuuninni misigisakka nuannernerpaat misigaakka. Nunaqqatitsinnit illersorneqarujussuarpugut, ataqatigiilluarnerput tassani malugaara. Neriuppunga Pan Am-ertoqalerpat unammisartut assinganik tapersersorneqarumaartut, oqaluttuarpoq. 2002-mi Savalimmiormiunut unammipput.
Nunanut allanut unammisartut nuannersunik misigisaqassasut Carsten Olsenip qularutiginngilaa.
- Inuiattut erinarsuut atulerutsigu kingumut qiviarumaarpunga. Unammisartut illersorsuaarumaarpakka. Soorunami Nunatsinni Pan Am-eqataarusunnaraluarpoq, unammisartulli allat taamak periarfissinneqarnerat tulluusimaarnarpoq, Carsten Olsen oqarpoq.
Erinarsuut Kalaallit Nunaat Pillugu eqqaamasaqarluarfigaa.
- Inuiattut erinarsuuterput atorneqarnera kiisalu Julie Berthelsen peqatigalugu sanaarput Kalaallit Nunaat Pillugu eqqarsaatigiinnarlugit suli qiiaammertarpunga. Unammisartutut peqataalluni taamani nukissaninnarturujussuusarpoq tusaallugit, taamaammat tassa neriuppunga tapersersorluarneqarumaartut, Carsten Olsen oqarpoq.
Kalaallit Nunaat Pillugu uani tusaaneqaqqissinnaavoq: