Palle: Qineqqusaarneq internetsikkut ingerlanneqassaaq

Apriilip arfernani kommunimut qineqqusaarnissaq coronap nunarsuarmi tuniluunneranit sunnerneqangaatsiassaaq.

Tassa qinersisartut qineqqusaarfimmut takkullutik qineqqusaartut kommuni sinnerlugu siunissamut takorluugaannik tusarniaasinnaanersut qularnarluinnarpoq.

- Suut tamarmik digitalikkut ingerlanneqarnerusalernerat sungiuttariaqarparput, qineqqusaarnissarlumi digitalikkut ingerlanneqartussaavoq. Qineqqusaarnitsinni facebook inuillu attaveqaqatigiittarfii allat atussavavut, naatsorsuutigingakku taamanikkussamut innuttaasunik amerlanerusunik ataatsimiisitsisinnaassanata, Palle Jerimiassen Sermitsiaq.AG-mut oqarpoq.

Avannaata kommuniani isorartoqisumi 10.000-it pallillugit innuttaqartumi borgmesterisut qinigaaqqinnissani neriuutigaa.

Pingaarnerutillugit sulissutiginiagai

Sooq taaguunneqarnissaminut pillugit qinersisartut qularunnaartissagunigit pingaarnerutillugit sulissutiginiakkani suunersut qularutiginngilaa. Pingaarnerutillugit sulissutiginiakkani pingasut oqaatigeqquneqarmata inuussutissarsiorneq, inissaaleqineq ilaqutariillu taavai.

- Siullertut ineriartorissatsinnut suliffinnillu pilersitsinissatsinnut tunngaviulluinnartoq, tassalu inuussutissarsiornermi atugassarititaasut pitsaasut pisariaqartinneqarneri ukkatariniarpakka. Inuussutissarsiorneq kommunitta aningaasatigut ineriartornissaanut tunngaviuvoq, taamaammallu kikkunnit tamanit soqutigineqarluni siunissami inuussutissarsiornermut pitsaasunik atugassaqartitsinissap ineriartortitsinissallu qulakkeerneqarnissaat, Palle Jerimiassen oqarpoq.

Itisilerlugu oqaatigaa, illoqarfimmut pilersaarutini inuussutissarsiornerup ineriartortinneqarnissaat ukkatarineqarneratigut, sanaartorfiusinnaasuni nutaani suliffinnik pilersitsinikkut umiarsualivimmilu pitsaasunik atugassaqartitsinikkut tamanna pissasoq.

- Kommunip avannaani erseqqissummik politikkerineqassaaq, aalisarnermi periarfissat annertuut atorluarneqassappata, umiarsualiviit annertusarneqarnissaat, inissaqarneq atortussallu allat inuussutissarsiornermik aalisarnermillu siarsaasinnaasut annertusaaffigineqarnissaat, taassuma erseqqissaatigaa.

Inissaaleqineq ilaqutariillu

Kalaallit Nunaanni sumiiffiit allat assigalugit Avannaata Kommuniani annertuumik inissaaleqisoqarpoq, ilaatigut utoqqarnut inissat amigaatigineqarlutik.

- Ilulissani minnerpaamik inissianik 300-nik sasnaartorniarpugut, kommunillu avannaaniittuni illoqarfinni nunaqarfinnilu inissialiortoqarnissaanik qanoq pisariaqartitsisoqartiginersoq qulaajaaffiginiarlutigu. Nammineerluni inissialiorsinnaanermut kajumissuseqarnerulersitsissaagut, Palle Jerimiassen sanaartorfigissaanermut akitsuummik atorunnaarsitserusuttoq oqarpoq.

Pingaarnertut sulissutiginiagaasa pingajuat tassaavoq, ilaqutariinnut pisariaqartitsisunut pisariaqartinneqartumik tapersersorneqarnissamik siunnersorneqarnissamillu neqerooruteqartarnissaq. Ilaatigut tamanna pissaaq ilaqutariinnut ilitsersuisarnissamik neqeroorutit nukittorsarneqarnerisigut.

- Immikkut pingaaruteqartoq tassaavoq, ilaqutariit atugarliortut ilaqutariittut kingornuttakkaminnik qaangiinissaannut neqerooruteqarsinnaaneq. Ilaatigut atornerluisut katsorsarneqartarnissaassa ukkatarineqarneruneratigut tamanna pissaaq, ullumikkummi katsorsaanissamut naammattunik neqerooruteqanngilagut. Ilaatigut ilaqutariit isumasioqatigisarnerat aqqutigalugu meeqqat atugaat eqqarsaatigalugit siusissukkut iliuuseqartarneq ukkatarineqarnerussaaq. Katsorsaanermut sanilliullugu pinaveersaartitsinerusoqalissaaq aamma oqartussat akornanni suleqatigiinnerusoqalissaaq, borgmesteri erseqqissaavoq.

Palle Jerimiassen isumaqarpoq, ”tutsuiginartuunini” aamma sukkulluunniit ”sulilluartarnini” pissutigalugit qinerneqartariaqarluni.

Akerlilersuiniartanngilanga

- Nutaaliortuuvunga ineriartortitsisarlungalu, aamma tamatigut ammaffigisarpara kommunimi unammlligassatta ineriartortinneqarnissaat, borgmesteri "kommunitsinnut Kalaallillu Nunaannut pitsaanerpaamik angusaqarfiusunik iliuuseqartoqartuartillugu" kikkut tamarmik suleqatigiinnissaannik kissaateqartoq oqarpoq.

- Partiimi sorlermilunniit ilaasortaasunut akerlilersuisanngilanga. Tamanut pitsaanerpaamik angusaqarniarluni isumaqatiginninniarnerni naapeqatigiittoqarnissaanik ujartuisuaannarpunga, taanna ukiuni sisamani kingullerni suliarisarsimasani pillugit oqarpoq.

Palle Jerimiassen isumaqarpoq, kommuni Naalakkersuisunik Inatsisartuillu suleqateqarluartarsimasoq. Taamaakkaluartoq isornartorsiugassaqarpoq.

- Namminersorlutik Oqartussat kommunip avannaata tungaani najugaqarfiit ineriartortinneqarnissaannut tapersiinerusinnaagaluartut, taakkummatami nunatta karsianut isaatitsinerpaasut. Isumaqarpunga, kommunitsinni aningaasat kommunimi sulisinneqartartut iluaqutiginerusinnaagivut, Siumumi potikkeri erseqqissaavoq.

Kommunalbestyrelsi

Ullumikkut kommunalbestyrelsi ukunannga inuttaqarpoq:

Siumut:

Palle Jerimiassen

Sakio Fleischer,

Jørgen Kristensen

Jakob Petersen

Susanne K. Eliassen

Ane Marie M. Andersen

Ane Lone Bagger

Jens Danielsen

Jens Kristian Therkelsen

Atassut:

Karl Markussen

Aqqalu Jerimiassen

Partii Naleraq:

Anthon Frederiksen

Aqqaluk Heilmann

Ole Danielsen

Inuit Ataqatigiit:

Bendt B. Kristiansen

Regine N. Bidstrup

Demokraatit:

Lena Ravn Davidsen