Pallep aninera: Peqqissimissutissaqanngilanga

Avannaata Kommuniani maanna borgmesteriusoq partiimit Siumumit aninini peqqissimissutiginngilaa, maannalu kommunalbestyrelsemi attaviitsutut sulinissaminut piareersimalluni.

Politikkikkut pissutsit taama itsillugit, Palle Jerimiassen Avannaata Kommuniani kommunalbestyrelsemi attaviitsutut ingerlaannartussanngorpoq.

- Avannaata Kommuniani Siumut gruppia taama aalangersimammat, Palle Jerimiassen, Siumut gruppiata Minik Høegh-Damimik tapersersuinerminnik utertitsinerat pillugu oqarpoq.

- Kisianni oqarsinnaanngillat ilisimasatik nutaat nutaarsiassaqartitsivinniit aatsaat paasillugit. Siumumit anilerama tamaasa ilisimatippakka suna tunngavigalugu anilernerlunga, suliarlu aamma oqaluttuaraara. Partiimit anisimanera maanna peqqissimissutiginngilara, Palle Jerimiassen Sermitsiaq.AG-mut oqarpoq.

Palle Jerimiassen Siumumit tallimanngormat ilaasortaajunnaarpoq. Tunngavilersuutigaa Minik Høegh-Dam pillugu ilisimasani aallaavigalugit tapersersuiniannginnermini parteeqatiminit taperserneqannginnini. Sermitsiaq.AG-mut qalleqqissaavoq eqqartuussinermut tunngasut paasissutissat parteeqatigisaminut siusinnerusukkut ingerlateqqissimallugit.

- Imminut neriorsornikuuvunga ilumoorlunga aamma uummatiga malillugu sulissallunga. Suli imminut tarrarsuummut qiviarsinnaavunga meeqqakkalu toqqarlugit qiviarsinnaallugit, nalunnginnakku aalajangernera pitsaasuusoq imminullu ilumoorfiginerusoq. Nalunngilara borgmesteritut ingerlaqqeratarnissannut periarfissakka sequmillugit taamaasiorama, kisianni ilisimasakka aallaavigalugit uanga uninngaannarunnanngilanga sunngitsuusaarlunga, Palle Jerimiassen oqarpoq.

Politikeri suleqatissarsiortartoq

Palle Jerimiassen kommunalbestyrelsemut qinersinermi 338-init taaneqarpoq. Taanna oqaluttuarpoq Siumumit anigami partiinut allanut ilaasortanngornissaminik isumaliutersuuteqarsimalluni. Maannakkutulli isikkoqartillugu attaviitsutut ingerlagallassaaq.

- Partiimit aninera isumaqanngilaq partiinik suleqateqarsinnaanngivissunga. Partiit allat suleqatigisareerpakka, tamanna aamma ingerlateqqissuara, Palle Jerimiassen oqaluttuarpoq.

Taanna politikereqatiminik kaammattuivoq borgmesterissamik toqqaalerunik eqqarsarluaqqusilluni.

- Uanga pinnanga, allaluunniit pinnagu, kommunilli pitsaasumik ineriartortinnissaa pillugu. Mittarfissualiorneq ingerlavoq, aamma aningaasaliisartut silatinnguatsinni kasuttorput. Aningaasaliisartunut soqutiginarluinnarpoq tulliani qanoq alloriarnissarput, aammalu kommuni ataatsimoortumik ingerlatsilluni sulinissaa, Palle Jerimiassen oqarpoq.

Palle Jerimiassen borgmesterip allaffianit naggataasumik aniguni sulerinissaminik eqqarsaatersuuteqareersimavoq. Namminersortutut suliffeqarfiuteqalernissani eqqarsaatigaa, takornarialerinermillu soqutigisaqarluni.

Powered by Labrador CMS