trækker sig fra Inatsisartut
Palle: Taamaattumik nunamit aallassaanga
Palle Christiansenip nunatsinni politikkimit tunuarnerminut itinerusumik nassuiaataa atuaruk
Demokraatit tunuliaqutaralugit Inatsisartunut ilaasortaq Palle Christiansen Facebookimi takisuumik nassuiaavoq sooq nunatsinni politikkimit tunuarniarnerluni Danmarkimullu nuulluni.
Atuaruk: "Palle Christiansen nunatsinni politikkimit tunuassaaq"
Nassuiaataa uani atuaruk:
´Tallimanngornermi 13/9-13-imi kingullermeersumik ingerlaaqataassaanga, naalagiaqataassallunga nunatsinnilu inatsisartuni ukioq nutaaq ammaaffigeqataaffigissallugu. Ukiuni 12-ni politikkimik sammisaqareersimallunga ilaquttakkalu aalajangerpugut uninniarlunga, qinnuteqarsimavungalu oktobarip 2-anni Inatsisartunit tunuarniarlunga.
Kigutinut nakorsanngoqqissaaq
Siunissami ilaquttakkalu Allerødimi (Sjællandimi, aaqqiss.) najugaqaqqilissaagut, tassani illumik pisisimagatta. Meeqqat atuarfissartik takoreerpaat, tamarmillu misigisassanut nutaanut periarfissanullu amerlanerusunut qilanaarput.
Græstedimi kigutileriffimmik nutaamik pisisimavunga, taamaattumik maanna kigutilerisutut tamakkiisumik sulilissaanga. Tamanna qilanaaraara.
Liberal Alliance-mut ilaasortanngorpoq
Politikki imaasiallaannaq qimanneqarsinnaanngilaq taamaattumik politikkimik aallussinera ingerlatiinnassavara. Ddanmarkimi Liberal Alliance-mut ilaasortanngorpunga, maannalu tungujortunik sorsoqateqarlunga Danmarkip aningaasaqarniarneranik ilorraap tungaanut aallartitsiniaqataassaanga.
Maani amerlanerpaat politikkimit tusagassiorfinnillu nalunngilaannga, oqartariaqarpungalu uanga nammineq partiillu qinersisartuinik kommunalbestyrelsimi Inatsisartunilu sinniisuusimaneq pissanganarsimasoq ataqqinaataallunilu. Nunatsinni politikkimi assigiinngissuteqartitsinissannut periarfissinneqarsimanera qujamasuutigeqaara tulluusimaarutigalugulu.
Qiasunngulluni aallassaaq
Ilissinnut tamassinnut sutigut tamatigut uannik tapersersuiuarsimasunut qujanarujussuaq. Immaqa tamatigut suleqatikkuminartarsimanngilanga, tamatigulli Demokraatit taamalu Kalaallit Nunaat 120%-imik sullinniartarsimavakka. Neriuppunga kingoraartissakka pitsaanerpaamik suliniuteqarumaartut, tamannali qularutiginngilara.
Uannik inuttut ilisimannittut nalunngilaat qiasunngullunga takoqqinnissatsinnillu oqarlunga aallalersunga.
Demokraatit pilersinniarnerannut piffissarujussuaq nukippassuillu atorsimavakka, soorunamilu politikkikkut sorsunnerit, qinngasaarnerit inatsisartunili pisartut tamaasa maqaasissavakka. Piffissap ingerlanerani suleqaterpassuaqarsimavunga, tamarmillu misigisamik ilivitsuutitseqataasimapput ingerlaqqinninni nassatassannik, immaqalu tullianik atuakkiussaguma oqaluttuanik nuannersunik ilaqassagunarpoq.
Nunatta pinngortitaa maqaasissavaa
Kalaallit Nunaanni pinngortitaq maqaasissavarput (Nuummi anorlertarnera kisiat pinnagu), angallammik angalasarnerpassuit, silaannarissuaq imerlu minguitsoq. Danmarkimili aallaavitsinnit nutaamit allanik periarfissaqalissaagut, tassalu nunarsuup sinnera tikikkuminarnerulissammat. Nunarsuaq qitornarsinnik kalaallinik nunarsuarmiunngorsaasussaq Kalaallit Nunaannullu ambassadøriulluartitsilluni.
Ilarpassuasi siunissami suli attaveqarfigisassavakka, tappavaniikkaangassilu kaffisoriartornissassinnut imaluunniit nerisassanik illernartutornisassinnut, maanna sanassallugit piffissaqarfigineruligassannut, tikilluaqquneqarpusi.
Tamassinnut qujanaq, misigisanut qujanaq qujanarlu ataqqinaataasumik Ilissi nunalu sullissinnaasimagassi´, Palle Christiansen allappoq.
Parteeqataata Anda Uldumip Palle Christiansen Inatsisartuni taarsissavaa.