Palle killitsisimasoq: Aqqut takisoorujussuuvoq
Attaviitsoq Palle Jerimiassen Avannaata Kommuniani borgmesteritut ivertinneqarpoq ullumi tallimanngornermi.
Partiit sisamat attaviitsorlu Palle Jerimiassen suleqatigiinnissamik isumaqatigeereernerisa kingorna Palle Jerimiassenip borgmesteriuinnarnissaa attanneqarpoq.
Palle Jerimiassenip borgmesteriuinnarnissani naatsorsuutigisimanngikkaluarpaa.
- Ukiunut allanut sanilliullugu pisumi aqqut takisoorujussuuvoq. Qineqqusaarnitsinni nukara toquvoq, tamanna misigissutsikkut assoroornaqaaq. Taasuuma kingorna Minik Høegh-Damimut suliaq saqqummerpoq, aamma tassani sunnertissutigaara, taavalu Siumumit anillunga. Aqqut ungaseqaaq imaannaananilu, Palle Jerimiassen Sermitsiaq.AG-mut oqarpoq.
Naatsorsuutiginngisamik sianerfigineqarneq
Kommunimi borgmesteriujunnaarnissani naatsorsuutigisimagaluarpaa.
- Allaffinni pisatakka sapaatip akunnera kingullerli imaajarlugu aallartippara, borgmeteritut ingerlaqqinnissara naatsorsuutiginnginnakku. Ilaqutariilluta nutaamik inuuneqalernissamik aallaaveqarluta piareersarluta aallartereerluta. Ippassarli suna tamarmi allanngoriataarpoq. Kia takorloorpaa borgmesteriuinnassasunga, illarluni oqarpoq.
Tassami Siumumik aamma Demokraatinik isumaqatigiissuteqarnissamik suleqataavoq siullermik.
- Borgmesterimut siullertut sinniisussatut eqqarsarluta isumaqatiginninniarneq killiffigigaluarparput. Anaanara ukiut marluk qaangiummata toqukkut qimaguppoq, iliveqarfimmut alakkaaruttorluta oqarasuaat sianerpoq. Suleqatigiittut imminnut taagortut oqarfigaannga borgmesteritut innersuunniarlunga. Aalajangiisussanngorlunga inissinneqarpunga. Taamatut aperineqarnera upperinngeqqaaraluarpara.
- Qasseriarlunga anaanamma ilivia kaajallakkaluarnerpara eqqarsaateqangaarama. Siumukkunnut isumaqatigiissummik taamatut inissiusareernikuugaluarpugut, taamatut inissinnera iluaagusussutigigaluarpara, aappaatigulli tassa aalajangiisinneqarpunga ilumut borgmesteritut ingerlaqqissanerlunga, oqaluttuarpoq.
Tatiginninnermik takutitsineq
Tatiginninnermik taamatut takutitsiffigineqarnini tuppalliutigaa.
- Taamatut partiit siammasitsigalutik, taamatut ataatsimoorfigineqarnera tuppalliutigeqaara. Pisussaaffiliivoq annertuumik. Borgmesterinngorninnut atatillugu oqalugiarninni oqarpunga, borgmesteriussallunga kikkunnut tamanut. Partiit apeqqutaatinnagit kikkut tamaasa tusaallugit pitsaanerpaamik ajunnginnerpaamillu siunnertaqarlunga sulissaanga, Palle Jerimiassen oqarpoq.
Inuit Ataqatigiit, Demokraatit, Atassut, Naleraq aamma Palle Jerimiassen isumaqatigiissuteqarput, isumaqatigiissutaat unnuaq nalunaaquttap 03.00-ip missaani inissittoq ilisimatitsissutigaa.