Palle Jerimiassen: Kommunip ineriartortinnissaa qineqqusaarnermi qitiulluinnassaaq

Kommunerujussuaq kommuninut marlunnut avinnerata kingornali Avannaata Kommuniani siullermeertumik kommunalbestyrelsemut qinersisoqartussanngorpoq.

Qinersinermi kingullermi Palle Jerimiassen (S) ikaarsaarnermi ataatsimiititaliami siulittaasunngorpoq, Qaasuitsullu kommuniani Avannaa Qeqertarsuullu tunua avimmata kommunimi avannarlermi borgmesterinngorluni.

- Kommunip tamarmiusup ineriartortinnissaata qanoq ingerlanneqarnissaa qineqqusaarnermi sammineqarluartut ilaanniissaaq. Kommunip naqqaniik tunngavissaa sinaakkutissallu maanna naammassilluinnarpagut, maannalu illoqarfiit nunaqarfiillu ineriartortinnissaat ukkatarineqarnerulersinnaavoq. Aamma inissaaleqineq ilaqutariillu atugaat oqallisigineqartunut ilaanissaat naatsorsuutigaara, Palle Jerimiassen (S) oqarpoq.

- Sammisaq ataasiinnaq toqqassagukku, suliani aallukkusutarni siulleq suua?

- Ataasiinnaaq? Taava kommunimi tamarmi inissaaleqinerup qaangernissaa, ilaqutariit tamarmik toqqissisimallutik inissaqarnissaat angujumallugu, sulissuteqarusuppunga, Palle Jerimiassen oqarpoq.

Tamat oqartussaanerat nalliussissaaq

Palle Jerimiassen (S) ilisimatitsivoq ukiuni pingasuni borgmesterioreerluni, kommunimi siuttutut inisseqqinnissani piareersimaffigissallugu.

Kommuninulli qinersineq ikinnerpaamik marlussunnik unammilligassaqarpoq. Coronavirusip tunillaassuutileratarsinnaanera ernumanaateqarpoq, pisortat akuerisaannik Danmarkimiit suli tikittoqartarmat. Aammali Inatsisartunut qinersisoqassaaq, nunamullu tamarmut tunngasut kommunip qineqqusaarutigineqarneranik ipisitsisoorsinnaallutik.

- Killilersuutit eqqarsaatigissagaanni, qineqqusaarnerup ilarujussua Facebookikkut ingerlanneqarnissaa piareersarparput. Nittartakkani tamat attaveqatigiiffiini peqataasinnaaneq killilersorneqanngilaq, taamatullu attaveqarluarsinnaavugut, oqarpoq nangillunilu:

- Ullorlu 6. april tamat oqartussaanerisa nalliuttorsiutigineqarnerattut uanga taarusunneruara. Qinersiviit tamarmik arlaatigut imminnut ataqatigiipput. Inatsisartuni aalajangikkat kommunini sunniuteqartarput, soorlu aamma kommunini aalajangikkat nunaqarfinnut sunniuteqartarput, nunaqarfiillu aqutsisoqarlutik aamma sunniisussanik. Ullup tamat oqartussaanerannut nalliuttorsiutigineqarnissaa aamma inissaqartariaqarpoq, Palle Jerimiassen Sermitsiaq.AG-mut oqarpoq.

Allaffissornertaa inissilerpoq

Erseqqissarpaa qularinngilluinnaramiuk ulloq qinersivik unnukkuutaalu ulapputeqarfiungaatsiassasoq. Qinersivinnut arlalinnut qinersisoqarnissaanut Avannaata Kommunia piareersarpoq, allaffiillu qinersivinnut aalajangersimasunut piareersartussat pilersissimallugit.

- Qinersinerit pillugit allaffissornikkut suliat immikkoortinnissaat soorunami unammillernartuusussaammat, taamaammat allaffiit immikkoortut pilersippagut. Allaffiup aappaa Inatsisartut qinersinerannik kisimi suliaqassaaq, aappaalu kommuninut qinersinermut kisimi suliaqassalluni. Ullormi qinersinermi ataqatigiissaarinerup pitsaasumik ingerlanissaa anguniarlugu taamaaliorpugut, Palle Jerimiassen oqarpoq.