Palle Jerimiassen aningaasanut inatsisissatut siunnersuut pillugu: Naapertuutinngitsumik assigiinngisitsineruvoq
Borgmesterip timmisartoqarfiup tungaanut aqquserniornermut amerlanerusunik aningaasaliisoqarnissaa kiisalu inuusuttut amerlanerusut periarfissaqartinniarlugit qitiusumik ilinniarfeqalernissamut aningaasaliisoqarnissaa ujartorpai.
- Aningaasanut inatsisissaq allanngortittariaqarpoq.
Avannaata Kommuniani borgmesteri Palle Jerimiassen tugagassiorfitsigut nalunaaruteqarnermini 2023-mut Aningaasanut Inatsisissatut Siunnersut isornartorsiorlugu taamatut oqarpoq.
Palle Jerimiassen isumaqarpoq, aningaasat aappaagumut immikkoortinneqarsimasut kukkusumik naapertuutinngitsumillu agguaanneqarsimasut.
- Namminersorlutik Oqartussat inuussutissarsiorneq tapersersorniarlugulu isummerput, taamaattorli taamaallaat siuariartornissamut tapersersorneqarsinnaasut kisiisa aningaasalersorusullugit, Kalaallilli Nunaannut siuarsarneqarsinnaasut
isertitaqartitsisinnaasullu aningaasaliiffiginagit, borgmesteri isornartorsiuivoq.
AAMMA ATUARUK: Borgmesteri naammatsittoq: Ilulissani takorniariartitsisarneq ingerlalluarpallaaqaaq
Taamatut oqarnerminug tunngavigivaa, Avannaata Kommuniata siuariartorfiunera. Kommunimmi aalisakkanik nunanut allanut nassiussuinerata Kalaallit Nunaat tamakkerlugu 50%-a isumagaa tassangalu takornarianik pilerisilersitsiniarluni annertuumik aningaasaliisoqartartoq suliffissanillu nutaanik ineriartortitsioqarluni.
Vigtig investering
Avannaata Kommunianit oqaatigineqarpoq - Kommuni Namminersorlutik Oqartussat aningaasaqarneranut pitsaalluinnartumik tunniussaqartartoq -taamaammallu najukkami politikkerit eqqumiigigaat, aningaasanut inatsimmi kommunit aningaasat pillugit
eqqarsaatigineqarsimannginnerat.
- Takornariaqarneq piffimmilu inuiaqatigiit ineriartortiinnassagutsigit taamaalillutalu Kalallit Nunaat tamakkerlugu pitsaasumik isertitaqarfiunissaa qulakkeerniarutsigu, pingaaruteqarpoq avannaani aamma Namminersorlutik Oqartussat aningaasaliinissaat.
Assersuut ersarissoq tassaavoq Aningaasanut inatsimmi equgasumik agguaassineq, mittarfiit aqqusinissaannut aningaasaliineq.
Namminersorlutik Oqartussat Qaqortumi mittarfimmut aqqusinertaassamut immikkoortitsipput kiisalu angallannermut periarfissat assigiinngitsut paasiniaaffigalugit. Ilulissani mittarfik nutaaq 2024-imi naammassissaaq kisianni Namminersorlutik
Oqartussat Ilulissani aqqusinermut nutaamut aningaasanik assigusumik immikkoortitsinngillat.
- Ullumikkut mittarfiup tungaanut aqqusineq tattoqittaaffioreerpoq taamaattumik pisariaqarluinnarpoq nutaamik mittarfissap tungaanut avaqqutsiffiusumik aqquserniornissamut aningaasaliisoqarnissaa. Kalaallit Nunaat tamakkerlugu mittarfittaassaniit ersertitaqarfiusussat eqqarsaatigalugit iluaqutaassussaapput,
soorliuna angallannermut piumasaqaatilimmut nammineq akiliiniartugut? Naammaginanngilluinaartumik immikkoortitsineruvoq, Palle Jerimiassen oqarpoq.
Takornariaqarnermut tunngasunik linniartitsineq
Ilulissani mittarfittaassap tungaanut aqqusineq kisimi pineqanngilaq, ukiunilu qulini tulliuttuni takornarianik nutaanik tusintilikkaanik pilerinarsititsilersinnaaneq aamma pineqarluni.
- Namminersorlutik Oqartussat maani avannaani inuusuttut takornariaqarnermut tunngasunik ilinniagaqalersinnaanerat aningaasaliiffigisariaqarpaat ineriartortitsillutillu. Tassa takornariaqarneq susassaqarfik annertuumik siuariartorpoq sualummik mittarfittaassamut tunngatillugu. Susassaqarfimmi inuusuttut iluatigaagut aamma ilinniarnissaannut suliffeqalernissaannullu amerlanernik periarfisserusuppagut, borgmesteri oqarpoq.
2023-imi Aningaasanut Inatsimmi 1 million koruunit Tunumi ilinniarfissaq nutaaq pillugu
misissuisoqarnissaanut immikkoortitsisoqarpoq. Aningaasat ilinniarfissat qanoq ittut pilersinneqartussat pillugit qulaajaanermut atortussaapput. Avannaata Kommuniani takornariaqarnermut inuussutissarsiorneq siuariartortoq atuutilereerpoq, takornariaqarnermullu ilinniagaqarneq piumasaqaataavoq, Palle Jerimiassen oqarpoq:
- Piffissanngorpoq Avannaani qitiusumik ilinniarfeqalernissaq, takornariartitsisarnermik
inuussutissarsiuteqarneq pissutaalluni suliffippassuarnik pilersitsissaaq taamaalillunilu aamma namminersortunut iluaqutaasussaalluni. Taamaattumik piffissaagallartillugu inuusuttagut pikkorissarnissaannut tuaviuussisariaqarpugut, taamaalillutik suliffiit pissangarnartut ineriartortinnissannut peqataassapput siunissamilu nuna tamakkerlugu isertitaqarnissaa qulakkiissallugu.