Palle Jeremiassen: Eqaluk ilumoorpoq
Maannamut iliuuserineqarsimasoq pitsaasimanngitsoq, Avannaata Kommuniani borgmesterip nassuerutigaa.
Kim Kielsenip maanna allatsigisimasariligaa, Eqaluk Høegh, kinguaassiutitigut atornerluinernut maannamut iliuuserineqarsimasut sakkortuumik isornartorsiorlugit Facebookimi videomik saqqummersitsigami, annertuumik maluginiarneqarpoq.
Maanna allaaserisap allannerani video 36.000-eriarluni takuneqarsimavoq. Kisianni tamanit maluginiarneqaraluartoq, politikkikkut tamanut nalunaaruteqartoqarnera annertunngilaq.
Kisianni Avannaata Kommuniani borgmesteri, Palle Jerimiassen (S) maanna oqaaseqarpoq.
- Eqaluup saqqumiussaa ilumoorpoq, meeqqat pillugit imaannaanngitsunik kivitassaqarpugut suliassaqarlutalu. Akisussaaffeqarnerput tamatta qimarratiginngilarput ilungersorluta iliuuseqarniarsarinermut suleqataavugut, taanna tusagassiuutinut nalunaarummi oqarpoq.
- Kisianni massakkut killiffipput qiviarutsigu ilumoorpoq suli suliassarpassuaqarpugut. Taakkualu suliassat pinngitsuuvinnata ilungersorluta aaqqiiviginiartariaqarpagut uatsinnut tikkuartuukkunnaarluta.
Tamatuma saniatigut Palle Jerimiassenip kajumissaarutigaa, Eqaluk Høegh aamma allat ajornartorsiutinik aaqqiiniarluni suleqatigiilluarnissaat.
- Kommunimiit ukiuni arlaqalersuni iliuuseqarnerit suliniutillu amerlapput aamma aningaasat atorneqartut amerlasoorujussuullutik, Avannaata kommuniani kr. 200.000.000,- sinnerlugit ukiumut atortarpagut, taamaattumik iliuuseqannginnermik oqalunnerit piviusorsiunngillat aamma iliuuseqarniarluta oqalukkutta aamma siunnersuuteqartariaqarpugut qanoq isilluta pitsaanerusumik iliuuseqarsinnaanerluta.
Atornerluisummi?
- Aamma aana apeqqut pingaaruteqartoq eqqartugassarput, sooruna kommuni ajornartorsiuteqarnermut pisuutinneqartuaannartoq, naammi taakku ajornartorsiummik pilersitsisut, taakkua sooruna pisuunngitsut taamatut inissisimasoqarneranut, allannguerusussuseq innuttaasuniit piusariaqarpoq taamatummi inissisimauarneq akuersaarsinnaanagu tamatta nilliavugut nukippassuillu atorlutigit.
- Ajortoqarpoq, aperisariaqalerpugut inuiaqatigiit ima sanngiitsigilersimanerpugut meerartagut akisussaaffigiunnaarsimallutigit pisortalli kisiisa isumalluutigilersimallutigit aaqqiinissamut, - naak inuup nammineerluni akisussaaffia.
- Pisortat qanorluunniit ikiuiniartigigaluarpata allannguisoqarnavianngilaq ajornartorsiutit qitia ilaanngippat, ajornartorsiutit taakkuujuassapput inuit taamatut iliortartut pissusiminnik allannguinngippata.
- Ajornartorsiutit aallaaviat angerlarsimaffinniippoq, inunni ataasiakkaani. Pissusilersuutit allanngortinneqarluinnartariaqarput, taakkua allanngortinneqanngippata ajornartorsiut utertuassaaq qanorluunniit kommuunit pisortallu allat ilungersortigigaluarpata.
- Iliuuseqarusoqaagut aamma ilungersorpugut, suleqatigiikkuttali aatsaat nikisitsisinnaavugut taamaattumik qujanarpoq innuttaasut namminneerlutik iliuuseqarnissamik allannguinissamillu nilliaateqalermata.
Tusagassiuutinut nalunaarut tamarmiusoq una linki malillugu atuarsinnaavat.