Palle Jeremiassen: Inatsisinik unioqqutitsisoqarsimappat tunuartoqassaaq

Palle Jeremiassenip, Qaasuitsup Kommuniani Siumup gruppiata siulittaasuata, partiimi siulittaasuni, Naalakkersuisut siulittaasuat Aleqa Hammonda tapersersorpaa, taanna kukkunersiuinermi paasineqarmat landskarsi nammineq kassekredit-imisut atorsimagaa, kukkunersiuinermullu ataatsimiititaliamit arlaleriarluni akileeqquneqartareerluni aatsaat qanittukkut 106.363.27 koruunit akilersimallugit.

– Kukkunersiuinermut Ataatsimiititaliap Aleqa Hammondimik misissuinini naammassisimammagu tamanna isumaqarsimassaaq inatsisinik unioqqutitsisoqarsimanngitsoq. Taamaattumik suli tapersersorpara, Palle Jeremiassen Sermitsiaq.AG-mut nassuiaavoq.

– Kukkunersiuinermut Ataatsimiititaliap Aleqa Hammondimik misissuinera naammassereerpoq, sulili misissorneqartussaavoq Naalakkersuisunut ilaasortat allat aamma landskarsip aningaasaataanik atornerluisimanersut. Paasineqarpat tamakkua aamma atornerluisimasut imaluunniit immaqa inatsisinik unioqqutitsisimasut, tamanna qanoq kinguneqassava?

– Inatsisinik unioqqutitsisoqarsimappat tunuartariaqarpoq. Kikkunnut tamanut atuuppoq. Aamma Aleqa Hammondimut. Tamanna qularutissaanngilaq.

Kukkusumik inissinneqarsimasut upperaa
– Aleqa Hammondili atornerluisimavoq immaqaluunniit inatsisinik unioqqutitsisimalluni, landskarsimit 106.363.27 koruunit ilaatigut timmisartumi billetsinut neriniartarfinniinnernullu atorlugit. Taava tunuassanngila?

– Aap tunuassanngilaq, pissutigalugu - paasisakka naapertorlugit - akiligassat naatsorsuutinut kukkusumik inissinneqarsimapput, taamaattumik Aleqa Hammond inatsisinik unioqqutitsinngilaq. Tamanna upperigallarpara, Palle Jeremiassen oqarpoq.

Kukkunersiuinermut Ataatsimiititaliaq septembarip 15-ianni Aleqa Hammondimut allagaqarpoq qinnuigalugu aningaasat atorneqarsimasut 106.363.27 koruunit nassuiaateqarfigeqqullugit.

Taanna septembarip 24-anni akissuteqarpoq, tassuuna uppernarsarlugu piffissami 2013-imi maajip 28-anniit 2014-imi maajip 21-annut aningaasanik pineqartunik namminersorlutik oqartussanut akiligassaqalersimalluni.

Aatsaat ukioq manna juunip aallaqqaataani aningaasat qasserpiaanersut Aleqa Hammond paasitinneqarpoq, taakkualu septembarip 8-anni akilersimallugit taanna nassuiaavoq.

Kukkunersiuinermut Ataatsimiititaliaq: Erloqinartorujussuaq
Kukkunersiuinermulli Ataatsimiititaliap akissutit naammaginngilai, septembarillu 26-anni ilaatigut allappoq tupaallaataasinnaanavianngitsoq Naalakkersuisunut ilaasortat landskarsi namminneq kassekredit-imisut atorsinnaanngikkaat.

Atornerluineq, Inatsisartut kukkunersiuinermut ataatsimiititaliaata qaqutigoortumik sakkortuumik qisuariarfigisaa.

´Pissutsit allaatigineqartut namminersorlutik oqartussat iluanni malittarisassanut aammalu nalinginnaasumik ingerlatsinermi malittarisassanut naapertuutinngillat, ataatsimiititaliallu pisimasoq erloqinartorujussuartut isornartorujussuartullu isigaa´, ataatsimiititaliaq qanittukkut Naalakkersuisut siulittaasuannut allappoq.

Allakkani ilanngullugu erseqqissarneqarpoq kukkunersiuinermut ataatsimiititaliap isumaqatigiissup pisut ima isornartoqartitsigalugillu killissamik qaangiinertut isigitigai, ataatsimiititaliap pisariaqartissimallugu atornerluinerujussuaq pillugu Inatsisartunut ilaasortat paasitinneqarnissaat. Tamanna pivoq tallimanngornermi septembarip 26-anni, unnullu taanna tusagassiorfiit aamma tamatuminnga paasissutissinneqarput.

Aleqa Hammondip nassuiaataa
Naalakkersuisut siulittaasuata Aleqa Hammondip nassuerutigaa landskarsi nammineq kassekredit-imisut atorsimallugu, akiligassallu akilersorlugit, tamanna takuneqarsinnaavoq Inatsisartut kukkunersiuinermut ataatsimiititaliaanik allaffigeqatigiittarsimanerani. Tamatumunnga utoqqatsissutigaa malittarisassat ilisimannginnamigit, Siulittaasup Naalakkersuisoqarfiata pisimasut sivisuvallaamik qulaajarniarsimammagit aammalu Naalakkersuisut siulittaasorisimasaat Kuupik Kleist, Inuit Ataqatigiit, taamaasiorsimasoq.

Tamanna Kuupik Kleistip nassuerutiginikuuvaa sukkanerpaamillu akiligassani 25.000 koruunit missaanniittut akilersimallugit.