trækker sig fra Inatsisartut
Palle: Imatut assigiinngisitsisimavunga
Palle Christiansenip nammineq Demokraatillu angusimasatik tulluusimaarutigai
Oqaatigineqareersutut Demokraatineersoq Palle Christiansen oktobarip 2-anni Inatsisartunut ilaasortaanerminit tunuassaaq.
– Kalaallit Nunaanni politikkimi immikkut sunniuteqarfigisimasannik tikkuaassaguma, soorunami uppernarsiniarnikuuara Demokraatit atangaarnaviannginnerarlugit allarpassuit oqalunnerat ilumuunngitsoq, partiiusorli pisariaqartinneqartoq, Palle Christiansen oqarpoq.
Atuaruk: "Palle Christiansen nunatsinni politikkimit tunuassaaq"
Atuaruk: "Palle: Taamaattumik nunamit aallassaanga"
Taanna malillugu Demokraatit partiiuvoq pissutsit oqaatigissallugit qununeq ajortoq aammalu pisariaqartunik aalajangiinissaminut qununeq ajortoq.
– Aamma misigisimavunga tusatsiakkanik pigiliussanik nungusaaqataasimallunga, soorlu najugaqariaaseq pillugu, pisortani kammalaatigiiaarneq pillugu, meeqqanik kinguaassiutitigut atornerluisarneq pillugu aamma pisariaqartoq sunitsinni tamani nungukkiartuutaanngitsumik ingerlatsisariaqartugut, Palle Christiansen erseqqissaavoq.
– Misigisimavunga 2001-mi politikkikkut imminut angusassiinikka angusimalerlugit aamma piffissami sivisujaami tunuarnissara eqqarsaatigereersimavara, nangilluni nassuiaavoq.
Demokraatinut takussutissaasoq
Palle Christiansen Demokraatit Inatsisartuni gruppianni siulittaasuuvoq 2012-imilu septembarip tungaanut partiimi siulittaasumut tulliusimalluni.
Qinigaaffimmi kingullermi taanna aningaasaqarnermut Naalakkersuisuuvoq Air Icelandimullu tunngasoq pissutigalugu ilinniartitaanermut, ilisimatusarnermut nunanilu avannarlerni suleqatigiinnermut Naalakkersuisunngortinneqarluni.
Marsimi Inatsisartunut qinersinermi Palle Christiansen 272-inik taaneqarpoq. Qinersinermi siuliani 396-inik taaneqarsimalluni.
Parteeqataata Anda Uldumip inatsisartuni inaa tigussavaa.