Folketingimut qinersineq
Palle Christiansen: Ajorsarnera anigussavara
Naalakkersuisunut ilaasortaasimasoq Palle Christiansen Nordsjællandimi 211-nit taaneqarluni Folketingimut isinngitsoorpoq
Palle Christiansen 211-nit taaneqarpoq, taakkuali Folketingimut ilaasortanngornissaanut naammanngillat.
- Folketingimut inissamut naammanngillat, kisianni naalakkersuisut nikinnerat pingaarneruvoq. Liberal Alliancemeersut qineqqusaaqatigalugit ataqqinaataasimavoq, Palle Christiansen tallimanngornermi oqarpoq.
- Ajorsarnera anigussagunarpara, kigutit nakorsaat Allerødimeersoq, kigutileriffiutiminik ineriartortitseqqinnialersoq, oqarpoq.
Børsenimi inini qinersinerup unnua
Folketingimut qinigassanngortittoq sisamanngornermi unnukkut Liberal Alliancep Børsenimi inini akimasuni parteeqatit hundredet arlallit peqatigalugit qinersinermut atatillugu nuannateqataavoq. Demokraatit sinnerlugu aningaasaqarnermut naalakkersuisuusimasup partiip siuariarujussuarnera minnerunngitsumillu talerperliit qinersinermi ajugaanera nalliuttorsiutigaa.
- Yes! ajugaasimaarpasilluni oqarpoq.
- Tulluusimaarlungalu naammagisimaarinnippunga, sulili pissangallunga, Palle Christiansen oqarpoq.
Qinersivigisaanit marluk ilaasortanngoraluartut siulittaasup Anders Samuelsenip taaguunneqarluarnermigut kikkut Folketingimut nassatarissanerai taamaalinerani suli ilisimaneqanngilaq. Palle Christiansen annikitsumik periarfissaqarpoq.
- Aap, ilumut! Isernissara suli neriuutigaara. Naalakkersuisutut misilittagaqarnera inunnit maluginiarneqarsimavoq. Uanga sioqqullunga qinigassanngortittoqarpoq najukkami politikeriusunik, kisiannili Folketingimi misilittagaqanngitsunik, Palle Christiansen oqarpoq.
Dansk Folkepartip siuariarujussuarnera politikerip sunnertissutigisimavaa.
- Taamaappormi, inuit oqaloreerput aamma aap, ilumut! Partiit politikerillu tamarmik ministeritut inissisimalernissamik anguniagaqartarput. Qineqqusaarnerullu nalaani allatut oqaaseqartarsimagaluarlutik sunniuteqarnerunerpaanissamik anguniagaqarput. Ministerinngornermi sunniuteqarneq annerpaaq anguneqartarpoq, politikeri oqarpoq.
Siulittaasup Anders Samuelsenip Lars Løkke Rasmussen naalakkersuisunik amerlanerussuteqartunik pilersitsiniarnissami isumaqatigiinniarsinnaatitaanermik tunineqartoq arfininngornermi ataatsimeeqatigissavaa.