Palasimut tapersersuilluni akerliussutsimik takutitsineq: Qilaat oqaluffimmi akuerisaasariaqarpoq
Inuit 60-it missaanniittut sisamanngornermi ualikkut Markus E. Olsenimut, Nuummi palasitut tunuartussamut tapersersuinertik takutinniarlugu akerliussutsimik takutitsinissamut takkussimapput.
Inuit 60-it missaanniittut Nuup qeqqaniittumi Amisuni katersuussimallutik Karale Kielsenimut tusarnaarput.
Seqinnerpoq. Taassuma qilaatip biibilillu akornnani pissutsit erseqqissumik nassuiaatigai, tamatumalu kingorna testamentitoqqamit atuaalluni.
Akerliussutsimik takutitsisut Markus E. Olsenimut tapersersuinertik takutippaat. Nunami palasini ullutsinni oqaluuserineqarnerpaaq Nuummi palasitut sulilerseqqinneqarnissaa akerliussutsimik takutitsisunit kissaatigineqarpoq.
- Markus E. Olseni inuppalaarnerusumik palasitut oqaluussisarpoq. Qilaatip atorneqartarnissaa akuerineqartariaqarpoq. Tamanna ukiut 100-t matuma siornatigulli akuerineqareersimasariaqaraluarpoq, Kaaleeraq Møller Andersen oqarpoq.
Erinarsorneq qilaatersornerlu
Kaaleeraq Møller Andersenip akerliussutsimik takutitsisut Nuutoqqami Annaasisitta Oqaluffiata tungaanut ingerlaatissavai.
Sapaatip-akunnerni kingullermi paasinarsivo, Markus E. Olsen Nuummi palasitut novembarimi suliunnaassasoq. Novembarip tungaanut palasitut sulitssanngilaq.
Markus E. Olseni juunip 21-ani inuiattut ullorsiornermi naalagiartitsigami politikkeritut oqaluussisimavoq akuerisaanngitsumillu qilaatersortitsisillunilu erinarsortitsisimavoq kiisalu Dronning Margrethep pilluaqquneqarnissaa ilanngussimanagu.
Akerliussutsimik takutitsinissamik aaqqissuussisimasup - Paninnguaq Heilmannip - akerliussutsimik takutitsinerup nipaattumik ingerlanneqarnissaa ilisimatitsissutigereersimavaa. Nipaattumillu ingerlanneqarluni.
Nipilersuut sunaagaluartorluunniit
Kaaleeraq Møller Andersenip erinarsorlunilu qilaatersornerata saniatigut Nuutoqqap tungaanut nipaattumik eqqissisimasumillu ingerlaartoqarpoqn.
- Isumaqarpunga nipilersuut sunaagaluartorluunniit atorlugu Guuti unnersiutigineqarsinnaasariaqartoq. Tamanna inissaqartinneqassaaq aamma oqaluffik kulturimut naleqqussartariaqarpoq, Kaaleeraq Møller Andersen akerliussutsimik takutitsineq naammassineqarmat oqarpoq:
- Qilaat oqaluffimmi unnersiutiginninnermi innuttaasunut naleqqussarlugu atorsinnaasariaqarparput.
Karale Kielsen akerliussutsimik takutitsinermi aallarniisoq biibilimit atuaammaat ersaattaattoqarpoq.
Kaaleeraq Møller Andersenip takkuttoqarluarnera nuannaarutigaa. Inuit amerlanerit takkunnissaat naatsorsuutigisimagaluarpaa, isumaqarporli atualeqqaarfissiorneq sunniuteqarsimassasoq.
- Tamannali ajunngilaq. Tapersersuisoqarluarpoq.