Pakkut Danmarkip matoqqanerani ilinniartunik tapersersuisoq
Kalaallit ilinniagaqartut, Danmarkip matoqqanerani ilinniakkaminnik naammassinnissamut qanoq iliorsinnaanersut pillugit siunnersuisartunit ikiorserneqarput.
Pilersaarutaareersutut danskisut pikkorissarnissat danskillu ilinniartitseriaaseqarneq internetsikkut ingerlanneqalersimapput, aamma angerlarsimaffimmi imminut mattusimaneq pillugu sapaatip akunneranut ataasiarluni ataatsimiittoqartalersimavoq.
Tassa siunnersuisarfiup Pakkut Danmarkimi corona pissutaalluni matoqqasoqarnerani kalaallit ilinniagaqartut tapersersorniarlugit suliniutaasa ilaai.
Danmarkimi ilinniartoqarfiit matoqqangaluartut ilinniartut suli ilinniarnermut malinnaasussaapput, atuarsimasassatik atuartussaavaat, eqimattakkaarluni suliassat suliarisussaavaat aamma angerlarsimaffimmi ilinniarnermi piumasaqaataasut allat isumagisussaavaat:
- Ilinniartut tamakkuninnga isumaginninnissamut imminnut aqussinnaasariaqarlutillu allanguinissamut piareersimasariaqarput. Taakku naammassiniarlugit Pakkummi suliniutiviut naleqqussarlugillu annertusisimavavut, Pakkummi suliniummik aqutsisoq Kistaraq Egede oqaluttuarpoq.
Ilinniarnermut internetsikkut ikiorserneqarsinnaaneq
Pakkummi suliniutigineqartoq Københavnimi Odensemilu Kalaallit Illui suleqatigalugit ingerlanneqarpoq, danskillu aningaasanut inatsisaatigut akilerneqarluni. Suliniut kalaallit Danmarkimi ilinniartut arlallit oqaatsinik danskisullu ilinniarnerannut ikiuutaassaaq.
Tassunga atatillugu Pakkut pikkorissaasussaagaluarpoq, ilinniartut najuullutik imminnullu naapillutik pikkorissartinneqartussaagaluaramik. Tamanna maanna nittartagaq Zoom aqqutigalugu pisussatut allanngortinneqarsimavoq.
Ilinniagartut aamma Kalaallit Illuini marlunni pineqartuni ilinniartunut namminneq piumassutsiminnik ikiuuttartunit internetsikkut ikiorserneqarnissamut periarfissaqarput.