qummoroortaatit

Paassat mianersuutikkit

Qaasuitsup Kommuniani Annaassianiartartutut Upalungaarsimasut qummoroortartunik qanoq ajoqusernaveersaarnisssamik siunnersuutaat

Qummoroortaatinik mianersuaalliornikkut isigisaarunnermik, assaajarnermik ajornerusumilluunniit ajoqusernermik kinguneqarsinnaapput.

Qaasuitsup Kommuniata Annaassiniartartutut Upalungaarsimasuisa qanoq imminut illersortoqarsinnaanera ima siunnersuuteqarfigaat:

  • Qummoroortaatit mianersorluni atorneqassapput
    Qummoroortaatit ukiutoqqami atugassaannatit pisiarikkit, panertumi kiisalu karsimut poorlugit toqqortarikkit. Qummoroortaatit kaasarfernut ikinngisaannakkit, qummoroortaatit puussiamut puukkit isinullu illersuutinik isarualerit – aamma aallakaatinneqartut isiginnaaginnaaraluarukkilluunniit, qummoroortaatip kiinnakkut eqqortuussagaluarpatit isarussat illersuutit isivit ajoqusernissaannit annaatissavaatit. Maluginiassavat angerlarsimaffimmi pisiniarfimmiluunniit qummoroortaatit annerpaamik 5 kg toqqortarisinnaammatigit annaassiniartartutut upalungaarsimasunit akuerineqarsimanngikkunik.
  • Qummoroortaatit pisiniarfinni pisiarisakkit
    Pisiniarfiit qummoroortaatit saniatigut isinut illersuutinik tuniniaallutillu siunnersorsinnaavaatsit. Pisiniarfiit qummoroortaatinik nioqquteqarfimminni annerpaamik 50 kg. tikillugu uninngatitaqarsinnaapput toqqorsivimminnilu qummoroortaatit annerpaamik 100 kg. toqqortarisinnaavaat. Qummoroortaatit pisiniarfimmi toqqortarineqarnissaannut malittarisassat immikkut ittut atuupput, toqqorsivigineqartullu annaassiniartartutut upalungaarsimasunit akuerisaasussaapput.
  • Qummoroortaatit inerteqqutaasut atunngisaannakkit
    Qummoroortaatit inerteqqutaasut kiinnavit tungaanut qaartoorsinnaapput isitillu ajoquserlugit uutissinnaallutillu. Nammineerlutit qummoroortartuliorniassanngilatit imaluunniit qummoroortaatit pisiniarfinni pisiatit allanngortiterniarsarissanngilatit.
  • Qummoroortaatit inerteqqutaasut unnerluutigikkit
    Qummoroortaatit inerteqqutaasut ulorianartorujussuusinnaapput, qummoroortaatit inerteqqutaasut paasigukkit toqqortarineriluunniit unioqqutitsineruppata politiinut unnerluutigikkit.
  • Qummoroortaatit annertoorujussuarmik ajoqusiisinnaapput
    Qummoroortaatit inunnut allanulluunniit miloriutinngisaannakkit, seersartoq nilliasartorlu heksehyl-iluunniit miloriunneqarluni atisap qungasiata killingatigut pulaguni uutitsillunilu ikuallatitsisinnaavoq imaluunniit nutsanik ikuallattitsisinnaalluni. Igalaat nal. 20:00 aamma 24:00 qummoroortartoqarnerani matoqqatikkit, qummoroortartoq maangaannaq aallartoortoq annertuumik ikuallatitsilersinnaavoq. Ajutoortoqarnissaanut imeq qallummut qatserulluunniit tigoriaannaatillugit piareersimatikkit. Ikuallattoqalerpat 113 sianerfigiuk.
  • Mianersorit!
    Qummoroortaatinik atuileruit inunnit, illunit kiisalu qimminut qimuttunut qanippallaarnaveersaarit, qummoroortaatit illup iluani ikinnaveersaakkit assarniitillugillu aallartinngisaannakkit. Qummoroortartunut aalajangerfissiat qisuttaanulluunniit ruujorit inissiiffissat atukkit, puiaasat apulluunniit manngersagaq aallartitsivittut atornagu.
Powered by Labrador CMS