Inatsisartut
Paasissutissiineq: Paarlaasoqareersoq inuit arfineq marluk Inatsisartuni ilaasortaalerput
Naalakkersuisunut ilaasortaalersut Inatsisartunit sulinngiffeqarnissartik pissutigalugu sinniisuusaasut Inatsisartuni ilaasortaalissapput
(Allaaserineqartoq nalunaaqutaq 08.53 allanngortinneqarpoq)
Politikkerinik qulingiluanik Naalakkersuisunngortitsisoqareernerata kingorna sinniisuusaasut Inatsisartuni ilaasortanngussapput.
Naalakkersuisunut ilaasortaalersut Inatsisartunit sulinngiffeqaleraangata sinniisui Inatsisartunut isertarput. Taamaattumik politikkerit arfineq marluk Inatsisartuni ilaasortaalerput. Aamma Naalakkersuisut siulittaasuat Inatsisartuni atajuartumik sulinngiffeqarneq ajortoq, Inatsisartut Allattoqarfiat Sermitsiaq.AG-mut nalunaarpoq. Naalakkersuisut siulittaasuat napparsimatilluni aatsaat sulinngiffeqarsinnaasoq Inatsisartut Allattoqarfianit nalunaarutigineqarpoq.
Naalakkersuisuni ilaasortaalersussaq, Vittus Qujaukitsoq Siumumeersoq, Inatsisartunut isinnginnera pissutaalluni sinniisoqassanngilaq.
Inatsisartuni ilaasortaalersut ataani takuneqarsinnaapput. Inatsisartunut qinersinermi novembarip 28-ani pisumi inunnit qassinit taaneqarsimanerat kisitsisinngorlugit ungalumi takuneqarsinnaavoq. 2013-mi qinersinermi 215-nit taaneqarpoq.
Siumut:
Jess Svane (171-nit taaneqarpoq)
Vivian Motzfeldt (153-nit taaneqarpoq)
Jens-Erik Kirkegaard (150-nit taaneqarpoq)
Demokraatit:
Michael Nicolaj Rosing (102 -nit taaneqarpoq)
Tillie Martinussen (62-nit taaneqarpoq)
Atassut:
Siverth K. Heilmann (256-nit taaneqarpoq)
Steen Lynge (135-nit taaneqarpoq)
Nunat allanut, inuussutissarsiornermut, suliffeqarnermut niuernermullu naalakkersuisunngortussaq Vittus Qujaukitsoq, Siumut, Naalakkersuisunngortussani kisimi Inatsisartunut isinngilaq. Inatsisartunut qinersinermi Vittus Qujaukitsoq 87-nit taaneqarnini pissutigalugu Inatsisartunut isinngilaq.
Inatsisartut tallimanngorpat inissititissapput, tassanilu aamma Naalakkersuisunngortussat inissititerneqassallutik.
Johansen siulittaasuuginnassaaq
Lars-Emil Johansen Siumumeersoq Inatsisartuni siulittaasutut ingerlaqqissagunavippoq. Naalakkersuisunut siulittaasunngortussaq Kim Kielsen tusagassiortunut pingasunngormat katersortitsinermi oqarpoq, Johansen Inatsisartut siulittaasuattut innersuunneqassasoq.