'Iluaqutissaq'
Paasisimasalik: Nalunaarusiaq avissaartuutitsisinnaavoq
Kalaallit Nunaata Danmarkimit namminiilivinniarnera sivisunerusumik ingerlasinnaavoq, naatsorsuutigineqareersumit sivisunerusumik aatsitassarsiorfinni iluanaarutissat isertinneqarsinnaassammata
- Namminiilivikkusuppugut.
Aleqa Hammond Naalakkersuisut Siulittaasunngunnginnermini taama oqariartuuteqarpoq.
Ilisimatuulli 13-init Nuup Københavnillu ilisimasimatusarfiini atorfeqartut nalunaarusiaanni nutaami takuneqarsinnaavoq Kalaallit Nunaat aningaasaqarnikkut nammineq napatilernissaat suli siunissami ungasinnerusumiittoq, Politiken allappoq.
Nalunaarusiami nalilerneqarpoq Kalaallit Nunaata aatsitassatigut imminut napatinniarnera aalaakkaanngitsuusoq.
- Aatsitassatigut isertinneqartussat ilimagineqartuniit annertunerunngillat, nalunaarusiami aqutsisoq Minik Rosing Københavnip Universitetiani professori Ritzau-imut oqarpoq.
Danmarkip ukiumoortumik tapiissutigisartagaat 3,6 milliard koruunit tikinneqassappata nalunaarusiorneranni paasinarsivoq Kalaallit Nunaat aatsitassarsiorfinnik angisuunik 24-nik atorfissaqartitsissasoq.
Aatsitassarsiorfinnik marlunnik maannakkut ammaasoqarnissaa pilersaarutigineqarpoq, ammarnissaanulli suli aningaasaliisoqanngilaq.
Avissaartuutitsisinnaavoq
Lars Hovbakke Sørensen Kalaallit Nunaat pillugu ilisimatuujusoq, Københavnimilu lektoriusoq isumaqarpoq nalunaarusiaq nutaaq innuttaasunik avissaartuutitsisinnaasoq.
- Nalunaarusiaq saqqummiunneqarpat soorunami pakatsisoqassaaq, immaqalu aamma inuiaqatigiinni avissaartuutitsisinnaalluni. Namminiilivinniarneq pillugu oqallinnermi isummat sakkortuut saqqummertarput oqallinnerillu sakkortusarlutik, Ritzau-imut oqarpoq.
Dansk Folkepartiip Kalaallit Nunaat pillugu oqaaseqartartuat Søren Espersen nalunaarusiaq kalaallinut eqeersaatitut taavaa.
- Nalunaarusiap takutippaa naalagaaffeqatigiinneq pingaarnerusoq. Kalaallit namminiilivinnissamut eqqarsaataat piviusorsiornerunngitsoq nalunaarusiap takutippaa, Søren Espersen oqarpoq.
Socialdemokratit oqaaseqartartuat Flemming Møller Mortensenip taama oqaaseqartoqarnera isumaqatiginngilaa.
- DF Namminersornermut inatsit taama oqarneranut ataqqinninngilaq. Kalaallit Nunaammi oqartussaaffinnik assigiinngitsunik angerlaassaqarnikuupput.
- Kalaallit suleqatiginiarpakka ikiorlugillu pissaaneqarnertut nammineq isiginanga naligisattulli isigialugit. Neriuutigaagalu namminersornermut inatsit ingerlalluarummartoq, Flemming Møller Mortensen oqarpoq.
Kalaallit Nunaat nammineerluni aatsitassarsiornermi aningaasat iluanaarutigineqartut kalaallinut kisimi tuttassappata Søren Esperseni isumaqanngilaq Danmarki Kalaallit Nunaannut tapiisarnera ingerlaannassasoq.
- Kalaallit Nunaat uagutsinnut ima oqartarpoq: 'Katinnikuuvugut, aningaasaatilissuanngoruttali avikkumaarpugut'. Tamanna akuerineqarsinnaanngilaq. Assigiinnarpaa uagut ukiuni 25-ni tulliuttuni lotto-mik eqquiniartut aningaasalersussagigut, DF-imi oqaaseqartartoq oqarpoq.
Lars Hovbakke Sørensen oqarpoq Kalaallit Nunaanni inuiaqatigiinni suli oqallisaasoq ilumut aatsitassarsiorneq nunamut aqqutaassanersoq.
- Inuiaqatigiit ilaat oqarput ingerlaannartumik aatsitassarsiorneq sunaluunniit aqqutigalugu aallartinneqassasoq, ilaalli oqarput atugarissaarneq ullumikkumit ajornerulissasoq oqaatigisarlugu, lektori oqarpoq.