Skip to main content

Paasisaq: Nuup avataani koraleqarfik nassaarineqartoq

Ilisimatusartut Nuup avataani immap naqqa immikkuullarilluinnartoq, sutsaanik uumassusilinnillu allanik 150-inik ulikkaartoq nassaarisimavaat.

Koraleqarfik pineqartoq Nuup avataani Toqqusap Ikkannersuata eqqaaniippoq immallu naqqata itisiliartuaarnera malillugu 60 kilometerinik ungasissuseqartoq tikillugu angissuseqarluni. Misissuiffigineqartut itissutsini 274 m aamma 585 m-ini ipput.

- Koraleqarfiit ilarsui eqimalluinnartunik orpippassuaqarfeeqqatut ittunik peqartitersinnaasarput, ilisimatusartallu ilimagaat tammaku uumaasusilinnit allanit allisarfittut perorsarfit tullu atorneqartarsimassagunartut. Taamaattumik taama ittut uumassusillit assigiinngisitaarnerannut pingaaruteqartumik inissisimanissaat ilimagineqarpoq. Aammali ilimagineqarpoq tamakku koraleqarfiit aserorneqaraluarunik assersuutigaluga qalorsuarsortunit pissusissaminnut uteqqinniarnissaat sivisoorujussuusinnaasoq, taamaattoqassagaluarpallu assorsuaq aseruinerussasoq, Pinngortitaleriffiup tusagassiorfinnut nalunaarutaani allassimavoq.

Pinngortitaleriffimmit ilanngullugu ilisimatitsissutigineqarpoq, koraleqarfik pineqartoq aalisarfinnut pingasunut assigiinngitsunut qanittuanniittoq, tassa raajarniat, avataani saarulliniartartut qaleralinniartartullu.

Videomut immiussisoqarsimasoq

Ilisimatusartut aalisarnermik ukiumoortumik misissuinerminnut atatillugu 2017-imili immap naqqa filmiliarisarsimavaat. Koraleqarfik nassaarineqaqqammersoq immap naqqatigut videoliuut atorlugu sumiiffiit assigiinngitsut 18-it filmiliarineqarsimapput, nalunaarummi allassimavoq.

Ilisimatusartartut nunatsinneersut tuluillu assilisanik 1.200-nik misissueqqissaarisimapput immallu naqqani uumasusillit 44.000 nalunaarsorsimavaat immap naqqanik katillugit 10.000 m2-inik isorartussuseqartumit assileersimasaminnit. Naak atuaannarlugu annertorpasissinnaagaluartoq, taamaattoq imartarujussuatta ilaminiinnanngua katilluni 2,2 millioner km2-inik angissuseqartinneqartup ilaminiinngua taamaalilluni nalunaarsorsimaneqalerpoq, Pinngortitaleriffik ilisimatitsivoq.

Imaani uummaveqarfiit mianernartut

Ilisimatusartut nalilerpaat, misissuinerit takutikkaat imaani uummaveqarfiit mianernartuusut, kilisalluni aalisarfigissallugit inerteqquteqalernermik nassataqarsinnaasut. Qimusseriarsuarmi imartat aqqaneq marluk kilisaffigeqqusaanatik matoqqatinneqarput Nuup avataani nassaarineqaqqammersunut sanilliullugu allatut koraleqarfiunertik peqqutigalugu.

Koraleqarfimmik nassaartuupput ilisimatusartut Pinngortitalerifimmeersut, University College Londonimeersut aamma Zoological Society of Londonimeersut, nassaarnerlu ilisimatusartut atuagassiaanni Frontiers in Marine Sciencemi allaaserineqarsimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER