Paasisaq: Miliuuninik nalilinnik isumaqatigiissuteqarsimasoq politiinut unnerluutigineqartoq

Kommuneqarfik Sermersuumit siusinnerusukkut nalunaarutigineqarnikuuvoq, sulisuusimasut marluk piginnaatitaanerminnik unioqqutitsisimasutut pasineqarlutik politiinut unnerluutigineqarsimasut. Kikkulli pineqarnersut taamani oqaatigineqanngilaq. Unnerluutigineqartut marluullutik unnerluutigineqartut tunngavissaqannginnerarpaat, Sermitsiaq.AG-mullu ilisimatitsissutigalugu unnerluussutaasunik suli saqqummiussiffigineqarsimanatik.

- Unnerluussut qanoq imaqarnersoq nalungakku oqaaseqarfigerusunngilara. Oqaatigisinnaavarali iliuuserisimanngisannik unnerluunneqarama ajuallassimallunga, Lars Møller-Sørensen oqarpoq.

- Kommunimit politiinilluunniit tusagaqarsimanngilanga, taamaamma tupaallallungalu pakatsivunga. Unnerluutigineqartut suusimagaluarnersut tunngavissaqanngillat, Hans Henrik Winther Johansen Sermitsiaq.AG-mut oqarpoq.

Kommunimit isumaqartoqarpoq, qaffasissumik atorfeqarsimasut taakku marluk akileraarutitigut miliuunilikkaanik annaasaqartoqarsimaneranut pisuussuteqartut. Tamanna allagaatini Sermitsiaq.AG-mit takuneqarsimasuni atuarneqarsinnaavoq.

Kiffartuussissutit isumagineqarsimanngitsut akilerneqarsimasut

Paasissutissat naapertorlugit, kommunimi pisortaasimasoq Lars Møller-Sørensen suliffeqarfimmut ataatsimut kommunimut arlalinnik kiffartuussinissamik isumaqatigiissuteqarsimavoq, kiffartuussutissalli taakku isumagineqarsimanngillat.

Isumaqatigiissut kommunip ukioq manna juulip qaammataani atorunnaarsippaa. Piffissami pineqartumi saqummiunneqarpoq, sulisut taakku marluk kommunilu isumaqatigiissuteqarlutik atorfimminnit tunuarsimasut, tassani allanik nassuiaateqartoqarsimanngilaq .

Piginnaatitaanermik atornerluineq

Inuk allat sinnerlugit iliuuseqarsinnaatitaasoq imminut allanulluunniit iluaqusiiniarluni aningaasatigut annaasaqartitsigaangami pinerluuteqartarpoq.

Pissarsiffik: Ordnet.dk

Suliffeqarfimmik pineqartumik isumaqatigiissuteqarnermi, kommunip sanaartornermut immikkoortortaqarfiani kommunillu inissiaatileqatigiiffiutaani sulisut aqunneqarnerat pitsaasumillu ingerlatsinissap qulakkeerneqarnissai pineqarsimapput. Sulisulli arlallit immikkoortortaqarfimminni kiffartuussisoqarsimaneranik ilisimasaqannginnerarsimapput, aamma inatsisilerituut naliliinerat malillugu kiffartuussinernut akigitinneqartut qaffasippallaarsimapput.

Kommuni 2020-mi januaarip qaammataaniilli suliffeqarfimmut pineqartumut qaammammut 100.000 aamma 200.000 koruunit akornanni akiliisarsimavoq. Kommuni katillugit 2.700.000 koruunit missaannik kiffartuussissutinut pisimarpasinngitsunut akiliuteqarsimavoq.

Taarsiissuteqarnissamut piumasaqartoqasinnaasoq

Kiffartuussinissamik isumaqatigiissummut akiliutigineqarsimasut kiffartuussisoqarsimannginnerlu pillugit sammineqartut saniasigut suliami takuneqarsinnaavoq, suliffeqarfimmi pineqartumi suliffeqarfimmilu allami kommunip suleqatigisaani aqutsisut taakkorpiaasut. Suliffeqarfik alla pineqartoq maannakkorpiaq immikkut misissuiffigineqarpoq.

Kommunip eqqartuussissuserisuisa avataaniillu eqqartuussissuserisut tamanna tunngavigalugu politiinut unnerluussinissaq tunngavissaqarnerarsimagaat Sermitsiaq.AG-mit paasineqarpoq.

Politiinut unnerluussinerup malitsigisaanik, politiit suliamik misissuinissamut periarfissaqalerput, tassunga ilanngullugu suliffeqarfiit taakku marluk pineqartut akornanni aningaasat ingerlaartinneqarnerat aqutsisullu pineqartut politiinit misissuiffigineqartussanngorput.

Suliffeqarfimmut pineqartumut isumaqatigissut atorunnaarsinnaarsinneqarmat, suliffeqarfiup isumaqatigiissut siusinnerpaamik 2023-p naanerata tungaanut atuummat, isumaqatigiissummik tunngavissaqanngitsutut atorunnaarsitsineq pillugu seks millioner koruunit missaannik kommunip taarsiissuteqarnissaanik piumasaqarniarluni suliffeqarfik nalunaaruteqarsimavoq.

Kommuni suliami taperserneqassappat, Lars Møller-Sørensen aamma Hans Henrik Winther Johansen taarsiissuteqaqquneqarsinnaapput.