Paarsisussaqannginnami sulisinnaajunnaartoq
Atugsuk Petersen Suersaq Savissivimmeersoq qaammatit arfineq pingasunngorpai suliffissarsiusisarfimmit suliffissarsioqqusaanani meeqqani paarsisussaqartinnginnamigit.
Qaanaap pigisaani Savissivimmi 54-inik inulimmi meeqqanik paarsisussaaleqisarneq ukiuni kingullerni ajornartorsiutaavoq. Savissivimmi angerlarsimaffinni meeqqanik paarsisitsisarneq siornatigut ingerlanneqartarnikuuvoq, tamannali unitsinneqarpoq Avannaata Kommunia aningaasanik sipaarniarluni aalajangermat.
Aviisi Sermitsiaq taama allappoq.
Taama pisoqareernerata kingorna meeralinnut suliumasunut eqquivoq, eqqugaanusullu ilaavoq 23-inik ukiulik Atugsuk Petersen Suersaq.
Taanna pingasunik meeraqarpoq naartullunilu. Ukioq kingulleq oktoberimi Qaanaamiit Majoriamiit suliffissarsiuussisarfimmiit Savissivimmut angalasoqarpoq, Atugsuk Petersen Suersarlu paarsisussaqannginnami immersugassamik immersuititaavoq sulisinnaajunnaarallarlunilu.
- Paarsisussaqaleruma aatsaat sulisinnaalissaanga aamma suliffissarsiorsinnaalissaanga. Tamannalu uannut assut nuanninngilaq, sulerusukkaluarlungami sulilersinnaanngilanga meeqqannik paarsisussaqannginnera pissutigalugu, Atugsuk Petersen Suersaq oqarpoq.
Atugsuk Petersen Suersap qaammatit arfineq pingasungorpai sulisinnaajunnaaramili angerlarsimaffimminilu meeqqani maannamut paariuarpai. Atugsuk Petersen Suersap neriuutigigaluarpaa Savissivimmi paarsisoqartalernissaa imaluunniit meeqqeriveqalernissaa.
- Assut neriuutigaara qanittumi nunaqarfitsinni meeqqanik paarsisoqartalernissaa imaluunniit meeqqerivimmik pilersitsisoqarnissaa, maanimi kisimiinngilanga meeqqanik paarsisussaaleqisoq, Atugsuk Petersen Suersaq oqarpoq.
Aviisimi Sermitsiami atuarnerusinnaavutit, aviisi uani pissarsiariuk: