Paarnat naatitallu aggiunneqartalernerat nuannaarutigineqartoq
Nuummi nittartakkakkut pisinianik sullissineq nutaaq aallarteqqammerpoq. Paarnat naatitallu pisiarikkit, angerlarsimaffinnullu aggiutsillugit. Tamanna amigaatigisimaqaarput, pisiniaq nuannaarluinnartoq oqarpoq.
Nittartagaq aqqutigalugu paarnanik naatitanillu inniminniigit. Arfininngornerulernissaa utaqqiguk. Pisiatit angerlarsimaffinnut apuutsikkit.
Nerisassanik pisiniariaaseq nunani allani atorneqarlualereersoq, Nuummi aamma atulerpoq.
Okay.gl nioqqutissanik aggiussisuuvoq, nerisassanillu aatsisartoq Pisiffik A/S suleqatigalugu Nuummi inniminniisimasunut agguaasarluni.
Arfininngormat siullermik aggiussuisoqarpoq. Pisiniarlu naammagisimaarinnippoq:
- Amigaatigisimavarput. Biileqanngilagut mikisunilli meeraqarluta, taamaattumik niuertarfinniiinnissaq ilaatigut unammillernarluinnartarsimavoq, Isabella Christin Schluchtmann Sermitsiaq.AG-mut oqaluttuarpoq.
Taanna paarnanik naatitanillu pajutsittalissalluni qaammatikkuutaartumik pisartagaqalerpoq. Pajuttuinerli siulleq unammillernarsimagaluartoq, tassa pajugutit kukkusut apuunneqarsimagaluartut, pisartagaqalernini taassuma unitsinniarnagu aalajangereersimavoq.
- Unitsinnianngilarput. Unammillernartoqaraluartoq aaqqiissuteqapallapput, nersorneqartariaqarlutillu, oqarpoq.
Ulluinnarni naatitartornerulerneq
Sullissinermi pisartagaqartut paarnanik naatitanillu pajunneqartassapput. Naatitat paarnallu umiarsuakkut aatsaat tikiunneqartut puuiarneqartassapput, pisartagalinnullu immikkoortiterlugit poortorneqartassallutik. Pisiniat nutaanerpaanik taamaasillutik naatitarsisinnaalissapput, nittartakkami allassimavoq.
Sullissinermik aallartitsisup takusinnaasimavaa naatitanik aggiussuisinnaaneq pisariaqartinneqartoq. Aggiussuinerlu siulleq iluatsilluarsimasoq, ingerlatsisoq Jens Andersen oqarpoq:
- Okay.gl arfininngormat aggiussueqqaarpoq, pisartagaqalertullu nuannareqaat. Okay.gl pisartakkanik allanik suliaqalereerpoq, ulluinnarni atorneqarnerpaasartut pitsaasunik akeqartillugit pisiarineqarsinnaasunngortinniarlugit, ingerlatsisoq oqarpoq.
Isabella Christin Schluchtmannikkut nillataartitsiviat paarnanik naatitanillu ulikkaarpoq. Ilaqutariinni inersimasut marluupput meeqqallu marluullutik, siornatigullu naatitanik qerititsivimmeersunik pisiinnartarsimagaluarput. Naatitalli nutaarluinnaat unnukkorsiornermi maanna nerisarisinnaanissaannut periarfissagissaarnerulerput.
- Naatitat nutaajulluinnarput illinnarluinnarlutillu. Iganitsinni aamma atorluarsinnaavagut. Aggiunneqartut aallaavigalugit peqqinnartunik nerisinnaavugut, aggiunneqartullu atorluarlugit nerisassanik igitsinaveersaarneq ingerlassinnaallugu, oqarpoq.
- Ilisarisimasagut tamassuminnga misiliinissaannut innersuukkusuttorujussuuagut, Isabella Christin Schluchtmann naggasiivoq.
Okay.gl nioqqutini illoqarfinnut allanut umiarsuakkut timmisartukkullu assartortissinnaanngortinnissaannut maanna suliaqartoq, Jens Andersen ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...